Desizaun ne’e Governu foti, hafoin halo análiza ba aprezentasaun husi Sala Situasaun Sentru Integradu Jestaun Krize (SIJK), kona ba pontu situasaun epidemiolójika nasionál.
“Impoin serka sanitária iha Munisípiu Manufahi, hahú husi loron 2 fulan-setembru to’o loron 15 fulan-setembru tinan 2021. Nune’e, bandu ema atu tama no sai husi munisípiu ne’e, exetu tanba siguransa públika, saúde públika, asisténsia umanitária, manutensaun sistema abastesimentu públiku ka realizasaun interese públiku,”dehan Ministru Prezidensia Konsellu Ministru Fidelis Leite Magalhães iha salaun Ministeriu Finansasa, kuarta ne’e (01/09).
Governante ne’e hatutan, proibisaun hirak ne’e la abranje ba ema hirak ne’ebé komprova ona vasinasaun kompleta (doze rua) kontra COVID-19, nune’e mós ba labarik ki’ik sira ho idade tinan neen (6) mai-kraik ne’ebé akompaña ema sira ne’e.
Entretantu, Serka sanitária sira-seluk ne’ebé sei vigora hela, la sofre alterasaun saida de’it.
Asistente Editor: Saturnina da Costa
