Enkuantu, ba Postu Administrativu Ermera no Postu Administrativu Railaku iha Munisipiu Ermera, Governo hapara ona Konfinamentu Obrigatóriu Jerál.
Desizaun ne’e Governu foti, hafoin halo análiza ba aprezentasaun husi Sala Situasaun Sentru Integradu Jestaun Krize (SIJK), kona ba pontu situasaun epidemiolójika nasionál.
Ministru Prezidensia Konsellu Ministru, Fidelis Leite Magalhães hatete, Governu mantein Konfinamentu Obrigatóriu Jerál (lockdown) ba populasaun iha Munisípiu Dili, inklui ema ne’ebé vasina kontra Covid-19, to’o loron 9 fulan-setembru tinan 2021.
“Bandu ema sira hotu iha Munisípiu Dili, inklui sira ne’ebé vasina kontra Covid-19, kontinua hela iha uma, bele sai de’it tanba razaun saúde, ba serbisu hanesan, iha kazu administrasaun públika, superiór ierarkiku ne’ebé define funsionáriu dispensadu husi dever komparénsia, atu asesu ba sasan no serbisu ba nesesidade bázika no atu simu vasina kontra Covid-19,” dehan, nia iha salaun Auditorium Ministeriu Finansas, Aitarak-Laran, Dili, kuarta ne’e (01/09).
Entretantu, Governante ne’e dehan, ba estabelesimentu komersiál, industriál, artezanál ka prestasaun servisu iha setór privadu ekonomia sira hotu ne’ebé dezenvolve atividade iha munisípiu Dili, taka ba publiku ho esesaun sira ne’ebé prevee antes ona.
Nune’e, kompara ho Rezolusaun anterior rejista de’it alterasaun rua, ne’ebé permite atu sai husi uma ba fatin seluk hodi realiza resenseamentu eleitorál no ba parte seluk atu asegura funsionamentu ba empreza prestasaun servisu sira ba kontrolu peste nian (Pest Control).
Asistente Editor: Saturnina da Costa
