Alterasaun dahuluk ba Dekretu-Lei nu.18/2012, loron 4 fulan-Abril, designadu nudar “Bolsa da Mãe” ba jerasaun foun.
Ho projetu Dekretu-Lei ida ne’e, atu reforma programa “Bolsa da Mãe”, ho hanoin atu garante katak ida ne’e bele jere impaktu signifikativu ida hodi hamenus ki’ak no ba promosaun kapitál umanu nasionál.
“Programa “Bolsa da Mãe” hahú atu integra prestasaun adisionál rua, ne’ebé ho objetivu atu fó apoiu sosiál ba inan isin-rua no ba primeira infánsia, hodi hadi’a saúde no nutrisaun materna no infantil, atu promove inkluzaun ekonómika no atu fomenta ekonomia lokál,”dehan Ministru Prezidensia Konsellu Ministru Fidelis Leite Magalhães iha salaun Ministeriu Finansasa, kuarta ne’e (01/09).
Entretantu, programa ne’e sei implementa ho forma fazeada ka progresiva, hodi asegura hanesan prioritária atuasaun iha área jeográfika ho indíse ki’ak no má nutrisaun no protesaun ba inan isin-rua no primeira infánsia.
Nune’e, programa sei haluan ba teritóriu nasional tomak durante tinan 5, hahú iha tinan 2022, ho munisípiu Ainaro no Bobonaro no ho Rejiaun Administrativa Espesiál Oe-kuse Ambeno (RAEOA).
Iha tinan 2023, Bolsa da Mãe ba jerasaun foun sei haluan ba munisípiu Kovalima, Likisá, Manatutu, no Vikeke. Munisípiu Ermera, Baucau, Aileu no Lutem sei inklui iha programa tinan 2024 nian, ikusliu, Bolsa da Mãe sei abranje iha munisípiu Dili, iha tinan 2025.
Asistente Editor: Saturnina da Costa
