Tanba ne’e, komunidade refere husu ba entre kandidatu Prezidente Repúblika na'in 16 bainhira eleitu tau matan hodi dada eletrisidade, hadia estrada, no harii postu klinika foun iha suku refere.
"Ami hakarak husu ba kandidatu ne'ebé mak eleitu sai prezidente republika iha periodo ida ne'e atu loke postu klinika atu bele tau matan mai ami nia saúde no kria mos kampu traball ba juventude sira atu nune'e labele kria tan problema ruma iha suku ne'e", dehan komunidade iha Aldeia Kailoi, Suku Uma Ain Kraik, Agusto Pinto, iha ambitu dialogu kampaña dalima husi kandidatu Constancio Pinto ho númeru 11, domingu (6/3).
Komunidade ne’e rekomenda ba kandidatu Constancio Pinto karik eleitu sai prezidente republika bele tau matan ba sira hodi rezolve problema hirak ne'e.
Nunee iha ambitu kampaña eleitoral husi kandidatu ne'e, hato'o mos programa ba komunidade sira kona-ba bainhira eleitu sai prezidente sei komunika ho Governu hodi hadia infrastrutura sira hanesan, estrada, no implementa bolsu estudu ba joven no seluk tan.
Agusto dehan, durante tempu ukun to'o agora estadu ka governu seidauk tau matan ba sira hodi hadia estrada, no harii postu klinika ba sira, nune'e to'o agora sira liga de'it mós liña eletrisidade husi parte Indonesia nian.
"Agora ahi lakan maibé ami sosa fali husi indonesia, durante tinan barak ona ami sosa fali ahi husi Indonesia", nia haktuir.
Nia dehan, iha fatin refere kona-ba bee mos to'o agora komunidade sira seidauk asesu.
Enkuantu iha suku Uma Ain Kraik, iha aldeia 3 hanesan, Aldeia, Wakae, Logo, ho Aldeia Dato, to'o agora seidauk asesu ba bee moos no seidauk iha postu klinika ba sira.
Nia hatutan, iha suku seluk iha Postu Adminitrativu refere barak mak seidauk asesu ba liña eletrisidade.
Aliende, iha Suku Uma Ain Kraik iha aldeia balun to'o agora mós seidauk asesu programa Uma Kbi'it Laek (UKL).
Enkuantu iha suku refere total populasaun hamutuk uma ka’in 50 maka seidauk asesu ba bee moos, liña eletrisidade no laiha postu klinika.
"Ami nia rekomendasaun ba Primeiru Ministru atual ne'ebé mak kaer ukun agora ne'e se bele tau matan mai ami dahuluk se bele hadia estrada ne'ebé kondisaun la di'ak, liña eletrisidade, no postu klinika ne'ebé hodi bele fó saúde di'ak ba ami no kria kampu traballu ba ami nia joven sira", tenik nia.
