Diretór Ezekutivu Asia Justice and Rights (AJAR), José Luis Oliveira, konsidera maske iha tempu ukun an ne’e iha feto balun ne’ebé hahú hamriik iha oin, maibé iha feto barak mak sei kontinua iha kotuk.

“Ohin (horseik) ita komemora loron internasional feto, maibé ita haree katak feto barak seidauk goza sira-nia direitu ho kompletu no feto barak sei sai vitima ba violensia no seidauk hetan justisa,” dehan nia hafoin partisipa komemorasaun loron internasional feto iha salaun João Paulo II, Komoro, Tersa (08/03).

Bazeia ba AJAR nia peskiza, nia dehan, justisa ba feto sira ne’ebé sai vitima ba violensia   seidauk la’o ho di’ak tanba estadu, liu-liu autoridade sira, dala-barak sei iha mentalidade ne’ebé ladun fó atensaun no laiha sensibilidade ba feto nia direitu ba justisa.

Iha fatin hanesan Diretór Jeral Sekretariu Estadu Igualdade no Inkluzaun, Armando da Costa hatete, loron internasionál ba feto importante tebes ba feto Timor-Leste, tanba loron ne’e fó oportunidade atu nafatin koalia kona-ba direitu feto no labarik feto sira nian.

Iha momentu ne’e, nia hatutan, atu asegura nafatin katak iha espasu ne’ebé natoon ba feto sira hotu atu bele hala’o sira-nia direitu hanesan sidadaun ida hodi bele hetan mós atendimentu públiku ho di’ak.

Durante ne’e, nia hatutan, iha mudansa lubuk ida ne’ebé konsege atinze no hatuur iha lei sira ne’ebé ezije direitu baziku sira, hanesan feto no labarik feto sira tenke asesu ba ensinu baziku iha area edukasaun nian.

“Ita haree husi parte saude nian ita iha fornesimentu fasilidade sira iha atendementu espesifiku ba inan isin-rua sira, ne’ebé liu husi estadu ita fornese ho gratuita ba inan sira,” dehan nia.

Aleinde ne’e, nia hatutan, iha politika, lei asegura katak feto bele partisipa laos atu vota de’it,  maibe bele mós kandidata an.

“Iha kontestu ida ne’e katak asegura no iha espasu publiku no asegura iha okaziaun no oportunidade atu feto no mane bele partisipa iha prosesu dezenvolvimentu ne’e iha kualker espasu tuir natureza demokrasia nian,” nia dehan.

Angela: Feto TL Tenke iha Integridade

Relasiona ho loron internasionál ba feto, kandidatu feto ida, Maria Angela Freitas da Silva, hato’o parabéns ba feto iha Timor-Leste no mundu tomak.

"Ha'u apresia tebes selebrasaun aniversariu ba loron feto nian ne'e ba dala 111, tanba tinan-tinan selebra katak ida ne'e hatudu ba feto maluk sira atu bele forsa nafatin hamriik metin tenke mai ho interigidade no servisu ho responsabilidade,'' dehan kandidatu numeru 3 ne’e iha nia knaar fatin, Formoza, Tersa (08/03).

Loron ida ne’e, nia hatete, sai mós hanesan korajen ba feto sira ne’ebé partisipa iha eleisaun Prezidensial nu’udar kandidatu.

“Ha’u enkoraja feto sira atu brani hakaat ba oin, oinsa mak envolve masimu iha organizasaun sira atu aumenta tan esperiensia no atu manan tan esperiensia kona-ba oinsa lidera organizasaun sira hodi di’ak,'' dehan nia.

Tuir Angela, tempu to’o ona ba feto TL atu hola parte iha prosesu  dezenvolvementu ekonomia hodi hadi’a povu nia moris.

"Tanba feto mak fó iis, feto mak fó moris,” dehan nia.

Ba ninia kandidatura, Angela dehan, nu’udar feto ida bainhira eleitu sai PR nia sei fó atensaun ba feto sira atu bele hatudu sira-nia kapasidade hodi envolve prosesu konstrusaun estadu.

Isabel Preokupa Kaben Sedu

Kandidata Prezidente Repúblika númeru 1, Isabel da Costa Ferreira preokupa feto Timor-Leste ne’ebé kaben sedu.

Nia hatete, atu hasai feto sira husi situasaun sira hanesan kaben sedu no abandona sira-nia direitu, depende ba ema idaidak nia an no familia.

“Ita iha papel ida importante presiza ita valoriza de’it ita-nia papel, se hanesan feto kristaun nia bele banati tuir ezemplu atetude Inan Virjen Maria nian, sai feto ne’ebé pasiensia no fiar metin, no korajen nafatin atu nune’e bele ultrapassa dezafiu hodi bele manan dezafiu hotu iha ita-nia moris,” dehan Isabel iha salaun Fundasau Quesadhip Ruak, Same, Tersa (08/03).