Tuir Prezidente INDDICA, Dinorah Granadeiru, hateten, tuir informasaun husi Komisaun F ne’ebé relata ba INDDICA katak, prosesu ba dezenvolvimentu finalizasaun ba proposta ba esbosu lei protesaun labarik no joven iha perigu remata ona iha tinan kotuk, no prosesu ne'e iha hela Komisaun F Parlamentu Nasional.

Nune’e, tempu badak sei haruka ba iha meza Prezidente Parlamentu nian hodi halo diskusaun iha plenaria.

Maibé, to’o agora INDDICA seidauk hetan fali informasaun ruma Parlamentu Nasional.

"Ami rasik mós preokupa ho esbosu lei ida ne'e, tanba lori tempu naruk no seidauk iha nia progresu to'o ohin loron, tanba iha fulan tolu liu ba ami rasik halo pedidu ofisial ba Prezidente komisaun F hodi husu kona-ba progresu husi lei ne'e rasik," dehan nia ba Online INDEPENDDNTE, iha knaar fatin, Kaikoli, kinta ne'e (08/09).

Nia hatutan, INDDICA hamutuk ho rede advokasi ba direitu labarik nian, nafatin halo esforsu atu bele dudu  prosesu ba esbosu lei ne'e bele ein vigor.

Tanba, INDDICA preokupa ho situasaun labarik sira nian, ne’ebé seidauk iha lei espesifiku ida, atu proteje sira.

Ho nune'e, nia dehan, haree ba esbosu lei ne'ebé seidauk iha progresu mak, parte direitu labarik nian kontinua halo advokasia,  atu Parlamentu Nasional bele konsidera no tau prioridade ba proposta lei ne’e.

"Tanba ita hotu hatene katak, iha tinan 2023 mandatu legislasaun ne'e remata, ami espera katak, PN bele tau prioridade ba proposta lei ne'e," nia dehan.

Tuir nia, lei ba protesaun labarik, komisaun F harmoniza ona, tanba iha proposta balun ne’ebé INDDICA rasik husi atu hadia ninia konteudu ka artigu balun, hodi bele hafasil ba iha implementasaun.

Nune’e, bele fasilita mós instituisaun sira ne'ebé servisu iha area labarik nian atu komprende diak liu hodi bele ezekuta.

Nia haktuir, antes atu tama ba resenseamentu Parlamentu Nasional nian, iha semana rua liu ba sira mós halo pedidu ofisial ida, ba Presidente Komisaun F atu bele hetan kopia konteudu ruma, karik lei hatama ona ba iha meza PN, bainhira ba final.

"Maibe to'o agora ami seidauk hetan resposta husi komisaun F, hodi bele hatene katak progresu ba proposta lei ne'e to'o iha ne'ebe," katak nia.

Enkuantu, Presidente INDICA ne'e, rekomenda ba Komisaun F atu konsidera pedidu ne'ebé sira sumete ba, antes resenseamentu PN ne'e remata, baihira tama ba prosesu debate OJE 2023 bele debate uluk lai proposta lei refere.

"Entaun ami espera, antes atu tama ba debate Orsamentu Jeral Estadu 2023 nian, bele halo plenaria uluk ba proposta lei ida ne'e, hodi halo debate, nune'e lei ne'e bele fó duni protesaun ba labarik sira," haktuir nia.

Ententantu, antes ne'e, Komisaun F promote, sei submete proposta lei protesaun ba labarik no foinsa'e iha perigu ba meza PN hodi halo ajenda ba diskusaun jeneralidade no aprova iha final global.

"Agora iha hela meza komisaun F nian, no ita sei envia ba meza PN hodi tau ajenda ba iha diskusaun hodi aprova iha final global", dehan Prezidente komisaun F Noe da Silva Ximenes.

Nia esklarese, komisaun F adianta tan ituan tanba UNICEF rasik mak hato'o sira nia relatoriu parese rasik kleur.

Nia hateten, Projetu lei protesaun ba labarik no foinsa'e iha perigu ne'e prefere liu ba oan no foinsa'e sira ne'ebe iha situasaun risku.

"Projeitu lei ne'e bele minimiza labarik sira fa'an sasan iha dalan publiku, maibe defende mos ba teknikamentu no implementasun, tanba ne'e, hanesan legislador tenke garante buat hotu ba oan sira no joven sira", nia dehan.