Tuir Portavoz AHMDTL, Carceres Nunes Arca Tura, hateten, relasiona ho kazu matebian José Bernardo ne'ebé hakotu is iha sela detensaun Komando Polísia Kaikoli Dili, iha loron 01 fulan-Setembru 2022, iha oras tuku 07:00, ne’ebé deskonfia tara-aan.
Ho situasaun ida ne’e halo públiku hakfodak no konfuzaun ho matebian José Bernardo nia mate iha sela laran.
Bainhira dehan, tara-aan ne'e la lojika, tanba sela detensaun hanesan fatin ne'ebé proividu, ema ne'ebé detein ou tama sela la ho atributu ou vestuariu ka armas brankas ruma tuir públiku nia hatene.
“Ami nafatin husu no ezije ba autoridade PNTL, liu-liu ba Komandante Jerál PNTL Komisariu Faustino da Costa, atu ezonera sira husi, sira nia kargu ka polísia maske membru na’in 8 ne’e suspende ona,”dehan nia iha konferensia imprensa iha edifisiu AHDMTL Manleuna, Dili, kuarta ne’e (07/09).
Ezekutivu ne’e, husu mós ba Autoridade PNTL atu kolabora ho PCIC hodi halo investigasaun klean ba ajente polísia hirak ne'ebé halo servisu ou pikete iha loron ne'ebé kaptura José Bernardo hodi ba detein iha sela to'o hakotu is no prosesa tuir dalan legal.
Enkuantu, atu hetan nafatin konfiansa husi povu katak PNTL mak imajen ba paz iha povu nia leet mak, AHDMTL dezafia nafatin PNTL atu halo deklarasaun ne'ebé lolos no koko atu labele asegura malu ba lia los iha instituisaun públiku ne'ebé ho prinsipiu igualidade no neutralidade hanesan PNTL.
"Ami husu ba Presidente Republika, Parlamentu Nasional, Tribunal Rekursu no Primeiru Ministru hanesan Ministeriu Interior, bele tau atensaun seriu ba kazu ida ne'e. Atu povu la bele moris iha paniku nia laran," dehan Nia.
Nune'e, AHDMTL husu mós ba Komisaun B Parlamentu Nasionál ne'ebé trata asuntu defeza no seguransa, hanesan reprezentante povu no hatutan povu nia lian labele nonok ba kazu refere, no tau mós atensaun seriu ba kazu ida ne'e.
Liu husi forma komisaun espesial ida ne'ebé independente, hodi halo investigasaun klean no klaru ba kazu ne'e.
Entretantu, molok ne’e, iha loron 05 fulan-Setembru 2022, Komandante Jeral Polisia Nasional Timo-Leste, foti medida kautelares hodi fó suspensaun preventive durasaun loron 60 ba membru Komando PNTL Munisipiu Dili na’in ualu (8).
Enkuantu, membru Komando PNTL Munisipiu Dili na’in 8, kompostu husi Ofisial na’in 3, Sargentu na’in ida no Agente na’in 4, hodi submete ba prosesu investigasaun disiplinar no criminal.
Sira ne’e mak ho naran tuir mai ne’e, Inspector Antonio Soares- As (Ofisial Dia), Inspector Mariano Soares-MS (Chefe SIK), Inspector Anita Quadros- AQ ( Adjunta SIK), S/C Lino Sarmento-Ls (Chefe Sek Detensaun), A/C Thomas Vieigas-TV (Pikete funsaun), A/C Francisco Amaral de Andrade-FADA (Pikete funsaun), A/P Agustino Afonso Magno-AAM (Investigador) no A/P Thomas do Carmo Punef-TDCP(Investigador).
