Tuir Diretór Ezekutivu AHDMTL, Gabriel Pousiano Souza, hatete, tuir observasaun husi organizasaun sosiedade sivil ne’e, nota katak, iha Postu Administrativu sira, ema ho defisiénsia balun nafatin hetan diskriminasaun liu-liu hetan violensia no balun familia izola.
“Ami husu ba Governu atu buka hatene kondisaun ema ho defisiensia nian iha munisipiu sira ne'ebé ema ho defisiénsia seidauk hetan nesesidade ruma, hanesan kursi roda, no sira ne’ebé seidauk asesu ba edukasaun inklusivu, liu-liu tulun sira asesu ba eleitoral, hodi bele hetan subsidiu ruma," dehan nia ba Online INDEPENDENTE, iha Edifisiu AHDMTL, Manleuana, kuarta ne’e (07/09).
Nia haktuir, sira nia moris iha munisipiu vulneravel liu tan, bainhira la hetan atensaun husi Governu.
Nia informa, maske nasaun Timor-leste kompleta tinan 23 konsulta popular, maibé ema ho defisiénsia nafatin hetan diskriminasaun no seidauk senti liberdade lolos ba sira.
Nia dehan, maske Governu adopta ona politika inkluzaun sosial ne'ebé programa ne'e desentraliza liu ba munisipiu, maibé programa refere seidauk la’o ho diak.
Nia fó ezemplu hanesan, iha munisipiu balun ema ho defisiénsia ninia kartaun eleitoral seidauk iha, maske sira iha ona idade 17 ba leten.
Ho preokupasaun ne’ebé sira hasoru, sira mós labele asesu ba subsidiu ne’ebé Governu fó liu husi Ministeriu Solidareidade Sosial no Inkluzaun ho ninia ekipa tekniku Institutu Nasional Seguransa Sosial.
Bazeia ba lei nú. 8/2008 ne'ebé apoiu subsidiu ba idozu no invalides sira.
"Tanba ne'e, ami nia posisaun atu defende direitu ema ho defisiensia, maibé ami labele halo buat ida, tanba ami hanesan organizaun naun governamental, ami nia forsa la to'o, halo netik buat ruma ba maluk defisiensia sira iha munisipiu", nia salienta
Ho nune'e, nia dehan, hanesan Asosiasaun Halibur Defisiénsia Matan Timor-Leste, nafatin hala'o advokasia no fahe informasaun ba inan-aman sira no mós prepara formasaun ba sira.
Entretantu, iha tinan ida ne’e AHDMTL fasilita ona formasaun ba membru ema ho defisiénsia sira hamutuk na’in 90.
Enkuantu, formasaun sira ne’ebé sira fahe ba membru sira mak hanesan, letra braille no mós edukasaun ba setor oioin.
