Koordenadór Unidade Monitorizasaun, Violasaun ba Direitu Labarik husi INDDICA, Isaias Carvalho Pereira hatete, INDDICA servisu hamutuk ho parseirus hotu ne’ebé servisu ba protesaun ba direitus labarik, rekomenda ba entidades hotu atu prevene, asegura no fó protesaun ba labarik sira husi risku iha durante periódu kampaña eleitorál no eleisaun parlamentár tinan 2023.
“Husu ba partidus polítiku sira atu prevene involvimentu labarik iha tempu kampaña no eleisaun parlamentár, no mós uza linguajen edukativu iha periodu kampaña”, dehan nia liu husi Konferênsia Imprensa iha Edifísiu Sentrál Ministériu Solidariedade Sosiál no Inkluzaun, Kaikoli, Tersa (18/04).
Nune'e mos, membru Rede Advokasia ba Direitu Labarik, husi Aliansa Nasionál Kombate Krime Infantesidiu Timor-Leste, Marciana Pereire, husu ba partidus polítikus, autoridade seguransa PNTL, inan-aman, manorin sira, ba labarik, mídia no instituisaun relijiozus, atu hamutuk fó prevensaun ba involvimentu labarik sira iha periodu kampaña eleitorál.
Entretantu, INDDICA konsiente katak, Konstituisaun RDTL no tratadu sira kona-ba direitus labarik nian ko’alia kona-ba papél família, komunidade no Estadu atu halo prevensaun, dezenvolvimentu no promove partisipasaun labarik iha moris públiku nian.
Iha periodu kampaña, partidus polítikus hotu hahú husi eleisaun ba Asembleia Konstituante 2001 ne’ebé hakotu governu tranzitóriu to’o eleisaun jerál 2007-2022 involvimentu labarik kontinua aas.
Fenómena ida ne’e tenke haré hanesan situasaun importante tanba kampaña Partidus Polítikus nian mak úniku festa demokrasia iha ne’ebé akontese mobilizasaun masa.
Organizasaun naun-governamentál sira ne’ebé hala’o servisu ba monitorizasaun eleisaun sira liu ba, halo dokumentasaun no relata katak, labarik barak mak involve iha kampaña partidus polítikus.
Identifika mós inan-aman barak lori oan iha udan no loron manas-laran hodi rejulta labarik barak hetan isin manas no meár, inklui sira fa'an sasan hodi kria perturbasaun ordem públiku.
Nune’e organizasaun sira ne’e halo konkluzaun katak, involvimentu labarik nian iha kampaña partidus polítikus sei kontinua aas no labarik sira sei sai vítima durante periodu ida ne’e.
Tanba ne’e, INDDICA ho ninia aliadu sira ba protesaun ba direitus labarik, sujere ba autoridades públiku no mós sosiedade hotu atu evita involvimentu labarik iha festa demokrasia ida ne’e.
