Prezidente CNJTL Maria Dadi Soares Magno hatete, liu husi kampaña ne'e, ema hotu bele hatene partidu sira nia programa, Partidu sira iha Timor serve no servi povu tomak nia intereseno di'ak ka lae no korresponde duni ba interese komun ba bem komun ka lae?.
"CNJTL husu ba kuadrus no militantes partidu pólitiku 17, liliu juventude ParPol sira hodi komunga komprimisiu ida de'it atu defende paz, estabilidade no unidade nasional ne'ebé hakerek ona iha plataforma Pakta Unidade Nasional ne'ebé ami organiza iha ambitu Eleisaun Presidensial," dehan Presidenti iha Edifisiu CNJTL Farol, Kuarta (19/04).
Prezidenti esplika, iha Estadu direitu demokratiku ne'ebé hamrik iha prinsipiu Demokratiku hodi kaer ba konstituisaun Repúblika TL nia hodi opta sistema Multipartidarismu mak iha tinan 2023, nudar tinan ida ne'ebé estadu RDTL hasoru festa Demokrasia hanesan ElPar.
"Atu tinan ida ne'e Pólitika la'o ho di'ak hanesan sidadaun mai ita ezerse hodi promove direitu politiku iha Nasaun ne'e ho Vizaun Estadista, Kaer Metin Valores Ukun Rasik Aan no Komunga Prinsipiu Unidade Nasional, Asaun Progresu Nu'udar Timoroan iha Paìs ne'ebé Demokratiku," nia esplika.
Nia haktuir, kabe ba artigu 46 no artigo 70 kontituisional, sira ezizi atu iha maturidade Politika husi polítiku sira hodi kaer elementu sira hanesan, ideolojia ka baze ideolojíka, programa partidu no iha vokasaun atu kaer ukun no poder hodi tau aas interese povu.
“Interese povu mak moris di'ak, dignu, paz iha justisa sosial, halakon KKN, hamenus Ki'ak, servisu dignu no konsidera direitu sidadania ne'ebé hakerek ona iha konstituisional RDTL,”dehan nia.
Tanba ne'e, CNJTL husu ba Juventude sira hotu hanesan Juventude partidu, estudantil, Universitáriu, agrikultor, difisiénsia ne'ebé moris iha risku nia laran husi suku, aldeia no bairo ne'ebé inkliña aan iha arte marsiais no arte ritual sira hotu, kopera ho parte hotu hodi mantein Paz no unidade iha prosesu kampaña durante eleisaun no depois eleisaun.
Nune'e mós, CNJTL husu ba ParPol depois eleisaun forma IX Governu konstituisional tenki iha estabilidade Governativa tuir art.69 konstituisional katak orgaun soberania haat, Prezidente Repúblika, Parlamentu, Governu no Tribunais, ida-dak iha nia kompetensia no direitu prerogativu maibé tenki iha hanoin ida no desizaun ida bainhira koalia kona ba interese Estadu no Nasaun.
