Prezidente INCSIDA-IP, Daniel Marça hatete, INCSIDA rejista kazu virus HIV/SIDA kontinua aumenta tanba, inan-aman ne'ebé la iha responsabilidade ba oan sira kontribui mós ba transmisaun virus HIV/SIDA.
Tanba ne’e, INCSIDA halo hela koordenasaun ho autoridade nasionál, munisipál no lokál hodi sensibiliza ema liuhusi liafuan ho informasaun sira ne'ebé kualidade bele konvense ema hodi kuda mentalidade.
"Transforma ema-nia mentalidade atu muda nia hahalok husi hahalok risku ba iha hahalok ne'ebé la risku," dehan Prezidente ba jornalista hafoin halo sensibilizasaun ba komunidade sira iha Suku Sibuli Metinaru, Kinta (13/06).
Atu hamenus transmisaun virus HIV/SIDA, nia dehan, dalan ida mak presiza kuda inan-aman nia mentalidade, tanba Maromak tau ema iha mundu liu husi inan-aman ida, tanba inan-aman la iha responsabilidade ba oan sira dadaun ne’e barak.
"Agora inan-aman ne'ebé ilegál no inan-aman ne'ebé la iha responsabilidade mak agora kontribui ba tranmisaun HIV no moras hada'et makaas," dehan Prezidente.
Prezidente hatutan, inan-aman ne'ebé ilegál no moris hamutuk la ho tempu ne'ebé naruk ikus mai husik oan sira moris iha situasaun ne'ebé la hakmatek no situasaun ida ne'ebé la saudavel tan nee to'o agora iha oan balun ne'ebé la respeitu inan-aman.
Administradór Postu Administrativu Metinaru, Domingos Soares hato’o agradese ba INCSIDA, tanba bele fahe ona informasaun HIV/SIDA ba komunidade suku tolu iha Postu Administrativu Metinaru.
Liuhusi sensibilizasaun ne’e, administradór husu, komunidade sira ne'ebé rona ona informasaun atu lori sai hanesan bukae ida, karik ba fatin ruma hanoin ona katak moris ne’e ida-idak lori no tenki la'o tuir kultura ne'ebé iha ona.
"Ba komunidade sira oioin joven sira futuru iha ita boot sira-nia liman, moris iha ita boot sira-nia liman ne'e duni informasaun sira ne'ebé mak Prezidente Institutu HIV/SIDA fahe ona hanesan bukae ida mai ita ne'e duni karik ba Dili, Korea no Austrália hanoin ba katak ha'u-nia moris ne’e naruk ha'u labele halo tun halo sa'e tenki la’o tuir kultura ne'ebé iha ona," dehan administrador.
Koordenadór HIV/SIDA Munisípiu Dili, Eugidio Pinto husu ba komunidade hotu atu hakbesik-aan postu no sentru saúde ne'ebé besik hodi teste raan atu hatene bele hatene ida-idak nia estatus kona-ba HIV/SIDA.
"Ami husi saude, husu ba komunidade hotu katak hakbesik-aan fasilidade saúde hodi teste ita-boot sira-nia raan atu hatene ita-nia estatus katak ita-boot sira afeita virus HIV/SIDA ka lae, sei ita deteta ka hetan ita fo tratamentu atu nune’e sira-nia moris bele mantein ho di'ak," dehan kordenadór.
Enkuantu, sensibiliza informasaun kona-ba transmisaun virus HIV/SIDA, INCSIDA-IP halo ona iha munisípiu sira hotu, no dadaun nee kontinua halo iha postu no suku sira iha teritóriu laran tomak.