“Luta atu labele iha hanoin brutalizmu, lae bele sai kauza ba konflitu. Tanba ne’e tenke renova ita ida-idak nia-aan maski ita la'o dook husi buat ne'ebé ideál”, dehan Bispu Dioseze Dili, Don Virgílio da Silva do Carmo, iha ninia omilia bainhira prezide misa padrueira São Miguel Arcanjo, iha Kuartél Jerál F-FDTL, Fatuhada, horisehik.

Bispu dehan, prezensa ba família tenke sai fonte alegria no mós parte vida moris ho rekonsiliasaun, liu-liu fonte unidade iha família, la'ós atu sobu.

Kada enkontru ne'ebé iha tenke kontente, maibé dala barak iha realidade moris buat ne'ebé mosu kontráriu ho ideál Maromak ninian. Kontradisaun ne’e mosu tanba kontra buat ne'ebé la di’ak.

Nune’e, prezensa ba instituisaun nia laran tenke sai sinál ba esperansa, nakonu nafatin ho espíritu umanizmu, ne’e mak bele dehan prezensa iha ne’ebé de’it hanesan grasa ida.

“Dala barak ita mós hanoin buat ne’ebé aas no ita mós mehi buat ne'ebé la tuir ita nia realidade, sirkunstánsia ne’e obriga ita inkonxiente ho komportamentu hirak ne’e”, tenik nia.

Nia dehan, instituisaun ne’e fó nafatin importánsia ba selebrasaun ne’e sai hanesan momentu, atu kontinua modifika kada membru nia hanoin, hodi motiva liután serbí povu no nasaun ho espíritu patriotizmu no nasionalizmu ne'ebé aas.