Alkatiri Buka Feto Ba Justisa no Turizmu Featured

By Tomé Amado Outubru 05, 2017 2561
Alkatiri Alkatiri

DILI: Posta balun iha VII Governu Konstitusionál sei mamuk hela. Ne’e duni, Primeiru Ministru, Mari Alkatiri, agora daudaun buka hela figura feto atu prienxe fatin hirak ne’e, liu-liu ba ministériu justisa no turizmu.

“Ha’u buka daudaun maluk feto sira atu tuur iha ministériu justisa no turizmu. Ne’e mak ha’u sei husik mamuk hela ne’e”, dehan Xefe Governu, iha Palásiu Prezidensiál, Tersa (3/10).

Alkatiri deklara katak, polítika ne’e hatuur atu tane aas igualdade jéneru no mós fatin sira ne’e serve duni atu feto sira mak sei asume.

Ba kargu rua ne’e, nia dehan, identifika ona feto maluk barak maibé sei halo prosesu selesaun didi’ak hodi bele eskolla na’in de'it fatin ne’e.

Ne’e duni, iha faze tuir mai ba pose ikus nian bele iha ona maluk feto na’in rua mak prontu ona simu responsabilidade nu’udar ministra justisa no turizmu.

Alkatiri dehan, Governu sei esforsu tomak hodi bele lori dezenvolvimentu hakbesik ba povu no nasaun.

Tanba ne’e, modelu ne’ebé utiliza ba formasaun governu ne’e mak Sistema insidénsia parlamentár.

Kona-ba diskusaun Orsamentu Jerál Estadu hasoru mai maioria parlamentár, PM Alkatiri lakohi atu ‘hakiduk’ uluk. Presiza tau ba diskusaun mak foin bele haree.

Nia dehan, bainhira ema hotu iha interese atu lori dezenvolvimentu ba rai ne’e, tenke hanoin didi'ak. Tanba governu ida ukun laiha orsamentu signifika sei laiha dezenvolvimentu.

Portantu nu'udar lider, nia afirma no iha konfiansa hodi hakat ba oin. 

Rate this item
(3 votes)

Independente Digital TV