Xefe Estadu Estadu Maior Jenerál F-FDTL, Tenente Jenerál Domingos Raul Falur Rate Laek hateten, asina akordu ida ne’e hanesan pasu importante ida entre Forsas Armadas ho ICRC atu halo kooperasaun, hodi prepara Forsas Armadas sira iha treinamentu oioin hanesan direitus umanus.

“Normalmente Militár sira kuandu halo asaun ruma iha terrenu ne’e sempre viola direitus umanus barak, aleinde ne’e uluk iha funu libertasaun nasionál ita nia arma de combate maka direitus umanus, ne’ebé ohin iha ne’e, ha’u ko’alia dehan katak relasaun F-FFDTL ho Cruz Vermelha Internasional ne’e la’os foin mak hahú, maibé hahú kedas iha tempu difisil nia laran, ne’ebé ida ne’e hanesan pasu importante ida bá funu libertasaun nasionál, tanba sira fó apoiu umanitaria fó mós dadus kona-bá violasaun direitus umanus bá mundu tomak, ne’ebé sensibilizaun halo opiniaun públiku internasionál, mai realiza ita nia referendum iha tinan 2002,”dehan nia iha Kuartel Fatuhada, Dili, kuarta ne’e (26/02/25).

Iha fatin hanesan, Adjuntu Xefe Delegasaun Rejional ICRC ba Indonezia no TL, Johan Guillaume hateten, Krus Vermella ho F-FDTL servisu hamutuk iha tempu naruk ona, oinsá foka liubá hasa’e koñesimentu liliu bá semináriu ka worshop lei umanitáriu internasionál sira.

Krus Vermella Internasionál nia komitmentu atu halo parseru no servisu hamutuk nafatin ho instituisaun F-FDTL liliu iha área ne’ebé temi ona hanesan lei umanitária internasionál sira.

“Ohin asina ne’e oinsá atu kontinua de’it extensaun servisu ne’ebé maka ita halo ona hamutuk ho F-FDTL, entaun nia objetivu maka oinsá atu hasa’e koñesimentu liu husi formasaun sira bá membru F-FDTL kona-bá lei umanitáriu internasionál iha tempu paz no konflitu nia laran”hakotu nia.