Xefe Departementu Medisina Interna, Gustavo Rosario da Cruz preokupa kona-ba númeru pasiente fase raan iha HNGV ne’ebé aumenta kada loron.

"Ha'u preokupa tebes ho situasaun no kondisaun sidadaun sira hotu iha teritoriu laran, tanba barak mak la kuidadu an hodi implika númeru pasiente fase raan. Kuaze loron-loron tenke rejistu ema na’in 10 ba leten," dehan Gostavo ba jornalista sira, iha nia knaar fatin, Kuarta (30/10).

Ho situasaun ne’e, nia dehan, HNGV hasoru difikuldade uitoan tanba edifisu foun ba pasiente fase raan seidauk konklui.

"Ita mós iha ona konstrusaun ne'ebé mak besik ona atu konklui, ne'e atu ba pasiente Hemodialis, ne'ebé ita hein kuandu remata ona pasiente sira ne'e sei ba hotu halo tratamentu iha ne'ebá, tanba iha fatin agora ne’e espasu ladún di’ak,”nia informa.

HNGV, nia hatutan, planu ona atu sosa tan makina fase raan.

Uluk, nia hatutan, kada tinan sempre haruka pasiente fase raan ba rai li’ur hodi halo tratamentu, maibé nia kustu boot liu.

Tan ne’e, nia hatutan, Ministériu Saude no HNGV halo planu ne’ebé iha hodi bele halo de’it tratamentu iha rai laran.

Tuir nia, pasiente fase raan sa’e maka’as tanba pasiente sira ne’ebé sofre raan midar ladún hetan kontrolu.

Aleinde ne’e, nia dehan, moras tensaun no moras primária sira seluk ne'ebé mak ladún hetan traramentu intensivu rezulta pasiente refere tenke fase raan.

"Depois iha mós problema rins tanba fatuk ne'ebé kleur demais ne'ebé halo rins ladún funsiona ho di'ak nune'e ikus mai pasiente sira tenke fase raan,” katak nia.