Vise PM Kalbuadi hato’o deklarasaun ne’e bainhira partisipa iha reuniaun Ministru Traballu ASEAN ka ASEAN Labour Minister's Meeting (ALMM) ba dala 28, iha Singapura.

"Reuniaun Ministru Traballu ASEAN ne’ebé marka momentu importante ida iha esforsu Timor-Leste atu integra iha ASEAN," deklara komunikadu ne'ebé  INDEPENDENTE asesu husi media Gabinete VPM Kalbuadi, Domingu (03/11).

Iha reuniaun ne’e, ALMM selebra mós ninia aniversariu ba tinan 50 ho tema ‘Hametin Reziliénsia no Promove Inovasaun’.

Iha okaziaun ne'e, Vise Primeiru Ministru halo mós intervensaun importante ida.

Vise PM Kalbuadi fó énfase ba importánsia kolaborasaun entre Membru Estadu ASEAN sira hodi navega dezafiu sira no oportunidade sira ne’ebé mosu husi mudansa ba mundu traballu global, foku ba ekonomia reziliente no polítika traballu ne’ebé inovadór.

Alénde fó diskursu, Vise PM hasoru mós Ministru Negósiu Estranjeiru Singapura nian, Vivian Balakrishnan.

Iha hasoru malu ne'e, lider na’in rua ne’e diskuti kona-ba apoiu sira ne’ebé Singapura fó no koalia mós atu hametin kolaborasaun ida ne’ebé forte liu tán iha futuru bainhira Timor-Leste sai membru ASEAN.

Diskusaun ida ne’e fó mos énfase ba objektivu komun atu promove reziliénsia ekonómika no dezenvolvimentu inkluzivu, hodi hatan Timor-Leste nia kompromisu atu kolabora rejionálmente.

Entretantu, Vise Primeiru Minsitru hasoru mós Ministru Traballu Singapura nian, Tang See Leng, hodi explora parseria potensial iha ámbitu traballu, dezenvolvimentu kualifikasaun, no inovasaun polítika.

Vizita ida ne’e marka papel ativa Timor-Leste nian iha konstrusaun lasu sólidu iha ASEAN no ba dezemvolvimentu koletivu iha rejiaun.