Deputada Bakanda FRETILIN, Nurima Ribeiro Alkatiri hatete, loron ne'ebé  feto Timoroam tenke selebra, maibé loron ne'ebé mós  tenke hanoin  pasu saída maka feto sira presiza hakat bá oin.

Tanba sei  iha buat barak ne'ebé  presiza atu garantia katak Tinan Timor  iha igualdade iha  nia Nasaun doben Timor-Leste.

“Loron feto ne'e hanesan loron reflsaun bá ita feto hotu-hotu,  bá jerasaun foun sira atu ita bele hanoin saida maka  ita bele halo  hodi kontinua kontribui atu dezenvolve ita nia Nasaun no  garantia katak maluk sira sente,  tanba ne'e ha'u enkoraza ha'u nia maluk feto sira katak sei iha oportunidade barak liután atu hola  parte bá iha vida polítika, vida sosiál, vida ekonómika iha Timor-Leste nian," Deputada Nurima Ribeiro Alkatiri hateten bá Jornalista  INDEPENDENTE, iha resintu PN Kuarta (29/10).

Deputada Nurima haktuir, loron feto  selebra iha loron 3 Novembru loron ne'ebé importante tebe-tebes bá  feto Timoroan hotu.

Tanba, marka luta husi maluk feto sira ne'ebé  kontribui mós ba Timor-Leste nia ukun aan,  hahú husi Maria Tapo, Soy Mali no seluk-seluk tan,  ohin loron la  hamutuk ona, no ba  balun ne'ebé maka sei hamutuk moris hela.

Iha, loron mundiál feto hahú bainhira grupu feto sira halo asaun pasífiku iha 8 marsu 1909. Iha 1911, loron mundiál hahú selebra ho foku ba valór sosiál, kultura, ekenomia no politika feto nian.

Nune’e, loron mundiál feto formalmente selebra sai hanesan loron mundiál feto ne’e hahú iha 1977, no Nasaun Unida deside sai hanesan selebrasaun mundiál kada tinan hodi luta ba feto nia direitu no luta ba pás mundiál.

Nia dehan, Estadu tenke halo buat barak,  maibé atu hahú tenke para ho teoria de'it  ne'ebé hateten  igualdade ne'e prioridade,

Maibé,  iha prátika  la haree, implementasaun orsamentu ne'e ladún koresponde,  haree alokasaun orsamentu bá Sekretáriadu Igualdade no Inkluzaun, ba programa sira relasiona ho igualdade Jéneru mós menus tan de'it.

“Ida ne'e preokupasaun boot, signifika estadu rasik la fó prioridade bá maluk feto sira atu hetan  oportunidade no hetan igualdade iha ita nia sosiedade,” Katak nia.

Nia haktuir tan,  prioridade seluk ne'ebé  Governu tenke halo maka, investe ba iha edukasaun, atu garantia feto sira bele iha asesu barak  ba iha edukasaun, la'ós iha edukasaun  primaria no sekundaria de'it, maibé atu bele partisipa mós iha vida  Profisionál.

Nune’e, iha área emprederorizmu mós,  maluk feto barak liu-liu foin sa'e sira ne'ebé maka agora koko buka inisiativa atu hahú sira nia negósiu ki'ik.

Nia  rekomenda bá Governu atu haree saída maka nesesáriu, la'ós investimentu orsamentu  de'it, maibé  iha mós formasaun no apoiu feto sira atu sai forte liután.

Seluk, Deputada Nurima, afirma área  saúde,  Governu  tenke hanoin katak  populasaun kuaze metades Timoroan,  presiza tau antensaun boot liu saúde matéria infántil  no bá saúde feto nian, atu garantia katak Timor nia sistema saúde ne'e, bele redus mortalidade feto nian no mortalidade infántil,  no mós bele fó antensaun boot bá maluk feto sira ne'ebé vulneravel presiza servisu saúde.

Maibé, kestaun seluk ne'ebé mós importante ba Timor maka  kona-ba violensia  kontra feto mós aas tan  de'it, no avuza Seksual,  ida ne'e maka presiza antensaun urjenti husi Estadu, tomak, husi Governu Parlamentu, prezidente Repúblika no Tribunál, atu garantia katak lei  violennsia domestika ne'e tenke implementa ho loos, atu eduka sosiedade hotu-hotu atu hadook aan husi violennsia.

“Ekorazamentu ne'ebé ha'u bele fó ha'u nia maluk feto sira  maka ita tenke fiar aan  no ita apoiu malu, labele ita ida-idak hanoin katak ita mesak,  maibé ita tenke fó apoiu bá  malu  husi família no mós husi maluk feto sira seluk no maluk mane sira atu ita bele hamutuk avsnsa  bá oin no hamutuk ita bele buras liután,” Nia informa.

Iha fatin hanesan, Bankada CNRT Deputada Bendita Moniz Magno hatete,  nu'udar feto iha Parlamentu Nasionál (PN) fó kongratulasun, parabéns no hakuak boot bá feto maluk sira hotu.

Nia dehan, feto Timoroan tenke sai independente (Mandirih)  buka rasik, atu avansa bá oin liu-husi kompetisaun  sira, iha eleisaun esembelia munisipal sira.

“Nu'udar Feto iha Parlamentu Nasionál, tanba husi feto maka ohin loron ami reprezentante sira iha  uma fukun ida ne'e,  tuir lei elelitoral,  tanba ne'e ha'u fó nafst ha'u nia kongratulasun  hakuak boot ba feto sira hotu ha'u nia dezeija katak ha'u nia maluke feto sira hotu tenke sai Mandirih  no mós  tenke buka avsnsa bá oin  espera feto hotu-hotu tenke avsnsa bá iha  eleisaun esembelia munisipal tuir mai  tenke korajen no forsa atu bele hasoru eleisaun ne'e iha ida-idak nia Munisípiu,” Nia afirma.

Nia dehan, loron mundiál  no loron nasionál  feto nian, atu bele motiva Feto sira hotu , atu bele avsnsa bá oin.

“Feto mós  bele dezenvolve aan iha área ekonómia, no agrikultura,” Katak nia.

Tanba, loron ne'e mós la'ós. Feto sira de'it, maibé tenke suporta husi mane iha loron feto ida ne'e, atu bele motiva feto sira hotu, hodi partisipa iha atividade oi-oin iha  rai doben ida ne'e.

“Ha'u espera katak  ho loron nasionál feto ninian ne'e,  ha'u nia maluk feton sira bele dezenvolve sira nia an iha área ekonómia, agrikultura no área da saída de'it maka feto bele halo, ne'ebé halo servisu iha uma laran, bele halo servisu iha li'ur no buat hotu-hotu ne'ebé maka  feto hetan ha'u fiar katak ha'u nia maluk sira bele  mós bele prontu atu serbí ba rai ida ne'e,” Nia relata.

Nune’e, nia rekomenda bá Governu liu-liu SEI, atu tau atnensaun hodi fó prioridade mós ba feto sira, atu bele mós hetan kna'ar  iha estadu ida ne'e ninian.

“Tanba ko'alia kona-bá igualdade Jéneru, labele dehan de'it mane maka barak liu, tenke halo separasaun hanesan,” Nia  reforsa.

Nia fundamenta, feto nia partisipasaun iha Governu nian, seidauk to'o pursentu 10,  tanba ne'e tenke fó mós prioridade bá feto sira hodi hola  parte iha Governu nia laran.