Iha loron ida ne’e, lider boot ida, Prezidente Repúblika, Nicolau dos Reis Lobato, hetan tiru husi militar Indonezia.

Hafoin Timor-Leste hetan ninia independensia, estadu deside hodi komemora loron 31 Dezembru nu’udar loron nasional eroi sira nian.

Ministru Asuntu Kombatenten Libertasaun Nasionál, Gil da Costa Monteiro ‘Oan Soru’ hatete, iha loron 31 Dezembru ne’e sei komemora loron nasionál ba eroi sira hodi hanoin hikas aswain sira ne’ebé sakrifika an ba luta libertasaun nasionál.

Nia dehan, iha 31 Dezembru 1978, Prezidente Republika no Prezidente Partidu Fretelin, Nicolau Lobato, mate iha inimigu nia liman.

Ba komemorasaun iha tinan ne’e, nia dehan, sei hahú ho atividade misa iha 30 Dezembru iha Igreja Parokia Metinaro iha tuku 9 ho balun, hafoin misa sei lori aifuna ba kari iha jardin erois Metinaro.

Hafoin ida ne’e, nia hatutan, iha 31 Dezembru tuku 7 ho balun dader sei konsentra hamutuk iha palasiu Prezidente Repúblika, Bairu-pite, hodi halo marsa husi to'o rotunda Nicolau Lobato, Komoro.

“Marsa fila mai to'o Palasiu Prezidente Bairu-pite sei formatura atu nune'e Prezidente Republika, José Ramos Horta, sei hato'o diskursu, no kalan sei iha atividade iha Palasiu Prezidente,” informa Oan Soru iha edifisiu KKLN, Komoro, Kinta (28/12).

Ba atividade kalan nian, Oan Soru dehan, Sekretariu Estadu Dezenvolvementu Lokal ho gabinete Prezidente Republika no Ministeriu Administrasaun Estatal mak organiza.

Ministru ne’e husu ba populasaun sira iha kapital Dili atu hamriik iha estrada ninin hodi akompaña marsa husi Palasiu Prezidente Bairu-pite to'o rutunda Nicolau Lobato atu nune’e hotu-hotu iha sentimentu hodi halo reflesaun ba loron nasional eroi.

Iha fatin hanesan, Sekretariu Estadu Dezenvolvementu Lokal, Mateus dos Santos Tallo informa, iha 31 Dezembru kalan sei halo reflesaun ba loron nasionál eroi sira.

“Povu tomak sei akompaña diskursu husi Prezidente Republika, José Ramos Horta, hodi simu tinan foun,” dehan nia.