Peskizadór AJAR, Inocencio de Jesus Xavier hatete, iha fulan ida Dezembru 2023, minarai husi Bayu Undan termina ona no ba fulan Janeiru laiha ona atividade operasaun ekonómiku.
Ida ne’e, tuir nia, sei fó ameasa boot ba Timor-Leste bainhira governu la halo politika poupansa.
"Entaun polítika governu ne'e tenke hanoin atu halo ona polítika poupansa ba ita nia estadu, liu-liu ba apoiu sosial sira," dehan Inocencio ba jornalista jornál INDEPENDENTE via telefone, Kinta (28/12).
Nia dehan, agora saláriu mensál 13 ne'e tuir loloos la'ós nu'udar direitu ne'e nu'udar direitu abonu ne'ebé tuir loloos tenke esklarese lei ruma halo klaru.
Nia afirma, maibé lejislasaun hotu-hotu ne'ebé tuir nia komprensaun, halo polítika ida refleta ba rekursu finanseira, atu bele finansia lejislasaun ne'ebé produs, ka polítika ne'ebé hakarak halo.
Nia preokupa mós ho subsidiu adisional ka subsidiu 13 ne’ebé estadu oferese ba eis titular no eis membru orgaun soberanu sira.
"Ita hanoin katak Timor ne'e la ezisté de'it ho periódu governasaun ida, estadu Timor Leste ne'e kontinua ezisté, entaun se mak ita oportunidade ba ukun ne'e tenke iha responsablidade atu halo polítika ida di'ak, asegura buat ida sustentabilidade no mós diversifikasaun ekonómika," hatete nia.
Tanba ne'e ho asaun sira ne'ebé governu ida agora halo, ne'e kontinuasaun husi polítika anteriór, ne'e nu'udar presendente ida ne'ebé mosu tiha ona iha tempu anteriór, tanba ne'e mak governu ida ne'e mai kontinua de'it saida mak iha, ne'ebé buat hotu-hotu ema dehan estadu direitu bazeia ba lei.
Nune'e, se estadu direitu bainhira lejislasaun ruma produs, governu iha obrigasaun atu implementa, se la implementa nia halo desobidiensia ba norma sira ne'ebé iha.
Nia esplika, se bainhira halakon direitu saláriu mensál 13 ne'e tanba la servisu to'o fulan 13.
"Ha'u la preokupa saláriu mensál 13 ne'e, ha'u preokupa mak osan husi ne'ebé atu selu sira, tanba ita hatene ona katak ita nia fundu minarai hanesan ne'e esplora mós seidauk lori rezultadu, pipe line ne'ebé kompromisiu eleitorál ne'ebé maun bo'ot Kay Rala Xanana Gusmão promete mós la konsege ba Beacu tanba tenke estudu foun entaun tenke gasta osan barak purvolta 300 italll milloens dollar foti husi fundu minarai ida ne'e rasik," hatete nia.
Molok ne'e, iha 9 Novembru 2023, Banku Sentrál Timor Leste (BCTL), lansa relatóriu trimestrál Fundu Petrolíferu Timor Leste nian ba trimestre datoluk tinan ne'e, ne'ebé termina iha loron 30 Setembru.
"Relatóriu ne'e hatudu katak kapitál fundu nian iha trimestre ikus ne'e mak biliaun $ 17,520 , kompara ho biliaun $ 18,075 iha fin trimestre dahuluk hafoin ajusta tiha 'fair value' dívida privada ba tinan 2022," dehan Vise Governadór BCTL, Venâncio Alves Maria liu husi konferénsia imprensa ne'ebé hala'o iha salaun Banku Sentrál, Akait.
