Iha konfrontu entre grupu artemarsiais iha Vemasse, rezulta ema na’in ida mate no na’in 10 resin hetan kanek. Enkuantu iha konfrontu ne’ebé akontese iha Kinta (04/07) no Sesta (05/07), ema na’in 2 mak mate, na’in tolu kanek todan, no uma 13 ho motor 7 hetan sunu.

Ba kazu ne’e, Polisia Nasionál Timor Leste (PNTL) Munisipiu Likisa konsege kaptura ona suspeitu na’in 10 ne’ebé deskonfia envolve iha kazu konfrontu ne’e.

Ba konfrontu entre grupu artemarsiais ne’ebé kontinua mosu, Organizasaun Naun-governamental (ONG) Fundasaun Mahein (FM) husu atu hasa’e di’ak liu tan kooperasaun entre autoridade lokal ho PNTL.

Diretor Ezekutivu FM João Almeida hatete, kazu violensia entre grupu artemarsiais hetok aat liu tan. Tanba foin iha fulan hirak liu ba mosu kazu iha Vemasse no Dili, no daudauk ne’e mosu tan iha Likisa.

Haree ba kazu ne’ebé akontese iha Leorema, defisil tebes atu bele identifika lider ne’ebé responsavel ba grupu artemarsiais ne’ebé estadu bandu ona.

Tanba, tuir nia, konfrontu ne’ebé akontese iha fatin balun la’os organizadu maibé insidente maske grupu balun organizadu.

Tan ne’e, tuir nia, importante tebes mak atu halo prevensaun nune’e bele evita konflitu mosu iha komunidade nia leet.

“Ha’u hanoin knaar importante ida husi autóridade local mak sira-nia partisipasaun, ninia kolaborasaun ho polísia, no serbisu informasaun mós, atu bele identifika area sira ne’ebé risku nune’e bele halo ona medida preventiva,” dehan Diretór ne’e iha nia knar-fatin, Segunda (08/07).

Atu bele iha medida preventiva ne’ebé di’ak, João dehan, autoridade lokal no polisia presiza buka no identifika problema nia fukun hodi rezolve.

Iha fatin ketak, deputadu Leandro Lobato lamenta ho konflitu entre grupu artemarsiais iha Leorema, Munisipiu Likisa.

Tuir informasaun ne’ebé deputadu ne’e simu, kauza husi konfrontu ne’e halo populasaun balun iha Leorema halai ba munisipiu seluk.

“Agora PNTL iha ne’eba maibé kuaze populasaun la hela iha uma tanba balun halai ba Ermera,” dehan deputadu ne’e iha PN.

Tuir nia, situasaun la hakmatek ne’ebé komunidade sira, liu-liu iha Leorema, hasoru tanba parte seguransa mak seidauk iha kompetensia atu hola desizaun ruma.

“Ha’u kolia dala-barak ona katak koloka postu permanente polisia ba fatin sira ne’ebé mak deteta katak fó risku, maibé informasaun ne’ebé ita foti ladun konsidera,” dehan Leandro.