Asaun ne’e rezulta ema na’in rua kanek, uma no sasan balun hetan estragus, inklui loza no edifisiu Jornal INDEPENDENTE.
Aleinde tuda patrimoniu hirak ne’e, membru balun husi grupu ne’e aproveita hodi foti komunidade nia sasan.
Tuir sasin balun, ema lubuk ida, balun uza motor no seluk la’o ain de’it, okupa estrada públiku no halo asaun tuda ema, uma no patrimoniu sira iha estrada-ibun.
“Sira hahú tuda husi Ailok Laran to’o mai iha ne’e (Hudi Laran). Ema, uma ka karreta tutuir dalan ne’e sira tuda arbiru de’it,” dehan sasin ida ba Jornalista Jornal INDEPENDENTE iha fatin akontesimentu, horseik.
Aleinde komunidade nia uma, sasin ne’e hatutan, loza sira iha dalan ibun, inklui mós edifisiu Jornal INDEPENDENTE hetan mós estragus.
La’os de’it estraga uma no sasan, membru grupu balun aproveita hodi foti komunidade nia sasan balun.
“Ema tunu sate iha ne’e sira mai tuda ne’ebé na’in halai tiha, sira foti sate haan tiha pois estraga tan ema nia sasan. Depois sira mós naok tiha kolega nia motor ida. Motor ne’e para hela iha uma oin, volante la xave, ne’ebé ida mai sa’e tiha no nia kolega na’in rua ho motor mak dudu husi kotuk,” informa nia.
Motor ne’ebé sira naok, fonte ne’e dehan, ho marka Sonic ho xapa matrikula P.3633.
“Ema sira ne’e mai aproveita naok hotu,” dehan sasin ne’e ho triste.
Enkuantu, edifisiu Jornal INDEPENDENTE ne’ebé lokaliza iha area Hudi Laran hetan mós konsekuensia husi asaun membru grupu arte-marsiais ne’e.
Membru grupu ne’e tuda kuak vidru edifisiu nian no tuda rahun mós lampu karreta jornal INDEPENDENTE.
Ba asaun ne’e, parte Jornal INDEPENDENTE prepara ona provas balun hodi aprezenta ba autoridade kompetente atu prosesa tuir dalan legal ne’ebé iha.
Enkuantu relasiona ho aktu ne’e, Jornalista Jornal INDEPENDENTE koko konfirma ho autoridade seguransa, maibé parte autoridade informa katak sira seidauk bele fó informasaun kona-ba akontesimentu refere tanba ekipa sei halibur hela dadus.
Entretantu, tuir informasaun, membru grupu ne’e halo asaun tanba mosu provokasaun husi grupu balun bainhira sira iha hela mate-uma.
