Diretór Ezekutivu FONGTIL, Valentim da Costa Pinto hatete, see iha ona ekipa tranzisaun ne'ebé la'o hodi prepara prosesu sira ne'e seidauk serteja ninia konkluzaun, bainhira mak bele ba governu sentrál atu bele hili ema foun ruma bele ba substitui Prezidente Autoridade RAEOA sesante, Arsenio Bano.
"Ami haree bainhira laiha ne'e iha duni afetasaun ba ita-nia prosesu ezekusaun orsamentu ba RAEOA ninian," dehan Diretór Ezekutivu FONGTIL, Valentim da Costa Pinto, iha Jardim Bebora, horisehik.
Nia hatete, agora Prezidente Autoridade RAEOA ninian ne'e mós kargu ida ne'ebé importante loos, tanba nia lidera mega projetu ne'ebé hala'o iha Oekusi.
Nia afirma, se ida ne'e to'o OJE ne'e promulga ona mak seidauk iha ema ida ne'ebé bele substitui Prezidente Autoridade RAEOA sesante ne'e, automatikamente afeta ba ezekusaun RAEOA ninian, tanba ema ne'ebé responsablidade laiha ezekusaun sei labele la'o ho di'ak.
Molok ne'e, iha 4 Dezembru 2023, Primeiru Ministru, Kay Rala Xanana Gusmão, liu husi despaixu númeru 014/GPM/XII/2023 harii komisaun tranzisaun ba mandatu membru sira Autoridade Rejiaun Administrativa Espesiál Oekusi Ambeno (RAEOA).
Despaixu Primeiru Ministru ho nian ne’ebé publika ona iha Jornal Repúblika konsidera katak, Lei númeru 3/2014, loron 18 fulan-juñu, altera ho Lei númeru 3/2019, loron 15
fulan-Agostu, 2/2022, loron 10 fulan Fevereiru no 18/2023, loron 30 fulan Novembru, hodi kria Rejiaun Administrativa Espesiál Oekusse Ambeno.
