PM Xanana dehan, governu iha hela preparasaun atu hadia ida ne’e, tanba sai tiha autonomu halo buat sira arbiru.

"Sim, kona-ba IP no EP ami haree tiha ona buat ida ne’e, mais governu anteriór lei iha ne’e, iha ne’ebá, ne’ebé atu haree buat sira ne’e hotu ita tenke modifika lei lubuk ida, ne’ebé ami iha hela revizaun.”

“Tanba lei sira ne’ebé sira kria fó ida ne’e no ida ne’ebá, liga ho ida ne’e, liga fali ho ida ne’ebá, tanba ne’e ami sei haree no se ida de’it ami kurize tiha ona, tanba ne’e mak ami iha hela preparasaun atu hadia ida ne’e,” dehan PM Xanana ba jornalista sira hafoin enkontru ho PR Horta iha Palasiu Prezidensiál Bairu-Pite, Kinta (18/07).

Nia dehan, hanesan merenda eskolár, iha fatin balun osan ba rai hela to'o osan barak ona sosa tiha fali karreta.

Nia hatete, sistema ida uluk monta laiha responsabilidade, auditória laiha, ho buat sira ne’e hotu mak governu hasai konkursu ba auditóriu internasionál.

"Ami hasai ona konkursu ba auditória internasionál tanba ami la'ós hakarak persege malu, la'e. Auditória internasionál ne’e só atu hatudu ba futuru líder katak buat hotu-hotu tenke tuir regra, iha fali governu seluk hakarak muda tun no muda sa'e, muda halimar ba depois auditória sei mosu," hakotu PM Xanana.

Molok ne’e, Prezidente Repúblika, José Ramos Horta, husu ba Primeiru Ministru, atu halo auditóriu kompletu ba IP no EP hirak ne'ebé útiliza osan boot, maibé la fó benefísiu ba estadu.

"Tenke halo auditoria kompletu ba IP no EP sira, tanba sira balun nia saláriu boot liu Prezidente Repúblika no Primeiru Ministru, maibé kada tinan la hatama reseita boot ba estadu, ida ne'e ha'u husu ona ba Primeiru Ministru katak IP no EP barak demais, maibé barak liu mak IP, se ita mantein nune'e ita-nia osan sei mohu," dehan PR Horta.