Ministru Koordenadór Asuntu Ekonómiku (MKAE), Francisco Amaral hateten, iha situasaun Estadu Emerjénsia anteriór kada uma kain hetan osan US$ 100 kada fulan, maibé agora daudaun governu hanoin ona mekanizmu foun hodi fahe voucher ba ema ida iha direitu ida.

Tuir planu voucher ne’e sei uza hodi halo kompras entre fulan-Novembru no Dezembru iha merkadu nasionál ka merkadu lokál.

“Bazeia ba voucher ka válidu-de-kompras kada família ida iha ema ida sei hetan sasán ho montante US$ 25. Karik iha família ida ema na’in lima entaun sira na’in lima ne’e hetan hotu,” dehan Ministru Francisco, iha edifísiu MSSI, Kaikoli, horisehik.

Nia esplika, iha situasaun ne’e tama iha programa rekuperasaun ekonomia, nune’e sei sosa sasán sira ne’ebé tama ona lista merkadu lokál no merkadu nasionál atu bele ajuda komersiante sira ne’ebé fa'an ai-han no halo to'os sira ne’e.

Lista ne’e sei hasai bainhira halo koordenasaun ho ministériu sira no inklui mós Ministériu Saúde atu haree ba nia kompozisaun ba nutriente no kaloria sira ne’e haree bazeia ba lista sira ne’e.

Aleinde ne’e, iha soru-mutu entre Ministru Koordenadór Asuntu Ekonómiku (MKAE), Francisco Amaral ho Vise-Primeira Ministru no Ministra Solidariedade Sosiál no Inkluzaun (MSSI), Armanda Berta, ko’alia kona-ba medida rekuperasaun ekonomia sira seluk.

"Enkontru ne’e importante tanba MKAE agora koordena hela planu rekuperasaun ekonómiku, iha planu rekuperasaun ekonómiku ne’e kontempla medida haat, maibé medida tolu ne’e sei monu iha MSSI nia responsabilidade. Tanba ne’e, mak ami tenke halo koordenasaun di'ak ba malu hodi aselera no ezekuta programa sira ne’e ho di’ak," dehan Francisco.

Nia esplika, medida tolu ne'ebé iha responsabilidade MSSI mak hanesan, ajuda ba kompañia sira atu bele hahú fila-fali sira nia atividade negósiu, oinsá ajuda setór formál sira bele rejista iha sistema seguransa sosiál no ajuda ba sira ne'ebé retensaun ba sira-nia obrigasaun iha sistema seguransa nian ne’e governu ajuda selu parte balun hanesan 6% husi valór 10% ne’e.

Medida haat ne'ebé tolu iha MSSI nia responsabilidade, ida hela iha MKAE nia koordenasaun mak nesesidade báziku nian ne’e oinsá atu buka sosa hahán no sasán sira ne'ebé fa'an iha merkadu nasionál atu bele redistribui fali ba ema ida-idak hetan.