Jestór Klínika Bairru-Pité, Inácio dos Santos hateten, sira asina ona nota entendimentu ho Ministériu Saúde (MS) hodi apoiu klínika ne’e.
Tanba ne’e, inísiu fulan-Setembru ne’e Klínika Bairru-Pité sei halo fali atendimentu ba pasiente sira presiza halo internamentu liu-liu ba moras tuberkuloze (TB) akumula pasiente na’in 20 to’o 30.
“MS iha memorandum ida hodi suporta finanseiru rihun $15 kada fulan ba Klínika Bairru-Pité, tanba ne’e iha fulan-Setembru nia-laran ami sei reativa fali servisu internamentu ba moras mal nutrisaun no mós ba inan partu,” dehan nia, iha knaar fatin, horisehik.
Inácio dehan, asina nota entendimentu ne’e Ministériu Saúde (MS) sei apoiu orsamentu ne’e hahú iha fulan Setembru to’o Dezembru de’it. Tanba ne’e ba tinan oin maka sei haree fali.
Nia informa, Klínika Bairru-Pité mós sei hetan fundu husi Gabinete Apoiu Sosiedade Sivíl ne’ebé kompromete mós atu suporta klínika. Durante ne’e Klínika Bairru-Pité hetan apoiu husi fundu globál liuhusi programa TB no HIV-SIDA nian.
