Tuir informasaun husi Movimentu Kontra Exbosu Lei Kriminaliza Difamasaun (MKELKD), sira simu konvite husi reprezentante ONU iha TL hodi halo enkontru hodi koalia kona-ba asuntu refere.

Portavoz MKELKD Inocencio Xavier hatete, MKELKD hetan konvite husi Reprejentante Nasoens Uninidas iha Timor-Leste ne’ebé apoiu no aseita inisiativa MKELKD.

“Aban (ohin) ami halo enkontru ida ho Koordenador Nasoens Unidas nian iha Timor-Leste,” dehan Inocencio ba jornalista jornal INDEPENDENTE iha nia knar fatin, Farol, Tersa (01/09).

“Nasoens Unidas la konkorda ho ita-nia estadu atu kriminalija difamasaun tanba ita iha estadu rejime demokratiku, devia ita fó espasu atu ita-nia sidadaun sira espresa sira-nia hanoin kona-ba lalaok governassaun nian relasiona ho politika publika.”

Iha enkontru ne’e, nia dehan, MKELKD sei aproveita hodi intrega relatoriu ne’ebé liga ho kriminaliza difamasaun injuria ba ONU.

“Ami-nia reprezentante sei ba koalia ho UN nia boot iha Timor-Leste hodi ami bele hetan espasu ba iha asuntu relevante,” dehan nia.

Kona-ba asaun tuir mai, portavoz ne’e hatete, hafoin entrega petisaun ba orgaun soberanu iha TL, nia parte sei hein desizaun husi Ministru Justisa Manuel Carceres.

Bainhira Ministru Carceres la kansela esbosu refere, nia dehan, MKELKD sei organiza fila fali asaun pasifiku hasoru MJ Carceres.

Molok ne’e, MKELKD hasoru malu ho Ministru Prezidensia Konsellu Ministru Fidelis Leite Magalhaes hodi hato’o petisaun no hanoin kona-ba esbosu kriminaliza difamasaun.