Projetu Dekretu-Lei ne'e, aprezenta husi Ministru Koordenadór Assuntus Ekonómikus(MKAE), Joaquim Amaral, kuarta (9/2), iha reuniaun Konsellu Ministrus. Ministru Prezidensia Konsellu Ministru, Fidelis Leite Magalhães hateten, ho projetu Dekretu-Lei ne’e, Governu hakarak kontinua fó produtu nesesidade dahuluk no garante sustentabilidade família sira nian, no iha tempu hanesan atu kria kondisaun normalidade ba atividade produtór no operadór ekonómiku nasionál sira tanba prokura menus.

“Sesta bázika ne’e fiksa ho valór másimu dolar amerikanu $50 ba membru ida-idak iha uma-kain sai benefisiáriu no sei distribui durante tinan 2022. Sesta bázika iha faze ne’e, kompostu husi produtu ai-han no sasan ijiene pesoál, hanesan deskrisaun, kuantidade no folin sei define liuhusi despaxu konjuntu membru Governu sira nian ne’ebé responsavel iha área komérsiu no indústria no kooperativa sira. Produtu lubun ida-ne’e bele troka ho “voucher” hodi sosa sasan sira,”dehan nia iha Palasiu Governu, kuarta horseik (09/02).

Nia akresenta, medida sesta Bázika ne’e limite ba ema sira ne’ebé presiza liu apoia ai-han, hanesan hakerek ona iha “Livru Rejistu Uma Kain nian”. Ba sidadaun sira ne’ebé ho titulár órgaun soberania no titulár kargu diresaun ka xefe departamentu sira husi servisu Administrasaun Públika direta ka indireta Estadu nian la inklui iha lista benefisiáriu nian.

Nunee, la inklui mós sidadaun sira ho ninia membru uma-kain ho rendimentu mensál boot liu dolar amerikanu $500. Ho diploma ida-ne’e, prosesu akizisaun no distribuisaun sesta bázika limite ba kooperativa no operadór ekonómiku sira ne’ebé konstitui formalmente, laiha dívida ba autoridade tributária no ne’ebé maioria husi kapitál sosiál sosiedade nian ne’ebé detida husi sidadaun timoroan ida-idak.

 Enkuantu, iha Dekretu Lei nu 48/2020 7 Outobru iha artigu 3(a-d), hatete, Governu produz politika ambitu rekuperasaun ekonomia ida ne'e hodi bele responde situasaun extraordinariu no implementa apoiu sesta bázika ba familia timor-oan hotu.

Tanba ne'e, programa sesta bázika faze tinan ne’e, sei implementa husi Ministériu Turizmu Komersiu no Industria (MTKI) no Sekretaria Estadu Kooperativa (SEKoop) ho valor dolar amerikanu millaun $80. Entretantu, antes ne'e Governu implementa ona progama sesta bázika ne’ebé benefisia ba timor-oan hotu hamutuk 1.491.661 iha baze, no iha aldeia hamutuk 2.234 no suku hamutuk 452.