"Kona-ba osamentu ba tinan ida ne'e, ita preve osamentu ba programa merenda eskolar purvolta millaun $8", dehan nia ba jornalista sira iha Palásiu Governu, kuarta horseik (09/2).
Nia dehan, programa merenda eskolár ba tinan ne'e, prevee iha Orsamentu Jerál Estadu (OJE) 2022, atu finansia programa merenda eskolár ba loron 100 iha eskola hotu iha teritóriu Timor-Leste.
“Ohin loron Administrador Munisípiu sira prosesa ona transférensia orsamentu merenda eskolár ba eskola hotu-hotu, ne'ebé ami mos hadia ona nia ezekusaun atu orsamentu ba merenda eskolár ne’e sai hanesan subvensaun públika ida ba eskola sira hotu-hotu, bainhira Administradór sira transfere ba, purtantu osan, ne'e sei utiliza iha eskola sira hotu, hafoin relatóriu sira hela iha eskola sira ba futuru editoria", nia dehan.
Nia fiar katak, ezekusaun programa merenda eskolar ba tinan ne'e sei la'o ho di'ak, tanba MAE aloka programa merenda eskolar ba iha loron 100 ba eskola hotu-hotu, maibé ideal ne'e ba 191.
Enkuantu MAE sujere iha tinan 2022 implementasaun programa merenda eskolar ba estudante ensinu baziku sira iha territóriu nasionál tenke efetivu, ne’e duni Ministériu Edukasaun ho Ministériu Administrasaun Estatal tenke iha liña koordenasaun di’ak.
Tanba programa merenda eskolar ne'e MAE desidi deskonsentra programa ne'e ba iha Munisipiu sira, atu kada munisipiu mak sei jere rasik osamentu ba programa ne'e, no programa ne'e diretamente jere husi Ministériu Edukasaun Joventude no Desportu (MEJD).
Entretantu molok ne'e, iha implementasaun programa refere tinan 2021 nian, MAE ezekuta ho di'ak, no ba estudante hamutuk rihun 32, iha Timor-Leste.
