Enkuantu, vasina ne'e transporta ho Aviaun TRI-M-G Asia Airlines, to’o iha Aeroprtu Internasional Nicolau Lobato, Komoro, iha tuku 14:30 Otl.

Tuir Enkaregadu Negósiu Embaixada EUA iha Timor-Leste, Tom Daley, hatete, Estadus Unidus hamrik hamutuk ho Timor-Leste hanesan amigu no parseiru diak bainhira servisu hamutuk atu kombate COVID-19.

“Kontribuisaun ohin loron refleta ami nia kompromisu atu apoia Governu nia esforsu atu salva moris iha Timor-Leste. Ami orgullu atu halo vasina ne’e disponivel to’o pandemia ne’e nia rohan no rekupera fali ekonomia.”dehan nia iha Aeroportu, Komoro, sabado nee.

Nia hatutan, kontribuisaun Estadus Unidus ba Timor-Leste, hahu husi prineira doze no segundu doze total vasina Pfizer hamutuk doze 201,240 liu husi Fasilidade COVAX.

Iha fatin hanesan, Diretór Aprovizionamentu SAMES, Nelson da Costa Correia, hateten, SAMES prepara ona kondisaun hodi rai vasina sira nee.

“Armazena ba ai-moruk sira, antes vasina sira ne'e mai, SAMES  hetan uluk apoiu husi UNICEF hanesan jeleira malirin ho sasan sira seluk ne'ebé prepara diak, hodi bele rai aimoruk sira ne'e,”haktuir Diretór Nelson.

Enkuantu, ba vasina doze hirak ne'e, hanesan kontinuasaun husi apoiu dahuluk ne'ebé Estadus Unidus Amerika oferese iha fulan-Outubro tinan 2021.

Entretantu, Ministra Saúde, Odete Maria Freitas Belo, hateten solidariedade ne’ebé parseiru COVAX hatudu, nee sai hanesan ezemplu di'ak, liliu iha tempu ida ne’ebé sira nia nasaun rasik barak mak hetan impaktu makaas husi COVID-19 no evolusaun variante hanesan Omicron.

“Kontribuisaun husi Governu Estadus Unidus liu husi COVAX sei apoia tebes Timor-Leste hodi kontinua vasina ema hotu ho idade 12 ba leten, no reduz risku husi kazu todan no hospitalizasaun,”dehan Ministra Odete.  

Enkuantu, vasina Pfizer BioNTech hirak ne’e sei uja atu vasina labarik-sira idade entre 12 no antes 18 no mós ba doze booster, tuir desizaun husi Governu Timor-Leste.

Asistente Editor: Saturnina da Costa