Ministru Administrasaun Estatal, Miguel Pereira de Carvalho, hato’o kestiona bainhira halo audiensia publiku ho Komisaun A Parlamentu Nasional kona-ba propostu-lei númeru 45/V(5), kinta alterasaun lei eleitoral.
Ministru Miguel sublina, governu mai halo audiensia ho komisaun A kona-ba proposta elterasaun ba dala-V lei eleitoral parlamentu nasionál nian.
“Governu iha fulan agostu tinan kotuk aprova no submete ona mai iha parlmentu nasionál ba alterasaun lei eleisaun parlamentu nasionál nian, ohin loron, bolu ami mai atu halo audiensia,” dehan nia, iha Parlamentu Nasionál, horisehik.
Nia haktuir, ida-ne’e servisu Parlamentu Nasionál atu halo pareser final, lori ba plenaria hodi halo aprovasaun jeneralidade, kontinua espesialidade no aprovasaun final global, depois haruka ba Prezidente Republika atu hetan promulgasaun.
“Governu aprova prospota alterasaun ida ne’e hodi introdus hodi realiza eleisaun parlamentar iha tinan ida ne’e. Alterasaun ne’ebé mak governu introdus ninia objetivu prinsipal mak atu garante eleisaun parlamentu nasionál maijumenus saida mak halo ona iha eleisaun Prezidente republika,” nia relata.
Nia haktuir, iha alterasaun ne’e governu introdus jornalista sira ne’ebé mak iha tempu eleisaun hala’o funsaun jornalista nian, iha tempu eleisaun iha ne’ebé deit bele ba vota, tanba iha eleisaun parlamentar antes ne’e la permite.
“Proposta seluk mak ita propoin atu estabelese sentru votasaun paralelu tolu, maibé sentru votasaun paralelu ne’ebé mak sei estabelese ne’e sei nafatin iha Dili,” nia informa.
Nia afirma, eleitores sira ne’ebé mak labele ba sira-nia munisipiu tanba razaun eskola, ekonomia, mediku no razaun sira seluk, ida ne’e bele ba rejista diretamente iha STAE, laliu husi Xefe Suku, Universidade, Komisaun Funsaun Públika.
“Medidas sira ne’e governu introdus tanba haree ba esperiensia foin lalais eleisaun ne’e. Lista ne’ebé mak eleitores liu husi Suku, Universidade, Komisaun Funsaun Publika la to’o ba iha STAE. Entaun governu introdus se mak hakarak vota iha sentru votasaun paralelu ba diretamente rejista iha sede STAE,” nia afirma.
Nia salienta, medidas foun ida mak governu introdus monitor ne’ebé mak halo funsaun observador iha eleisaun parlamentár, maibé governu introdus atu sentru votasaun ne’e loke iha tuku 7:00 taka 15:00.
“Agora iha rai liur governu propoin iha alterasaun ida sentru votasaun loke iha dader tuku 7:00 no taka tuku 20:00 kalan, tanba taka iha tuku 15:00 balun sei iha hela servisu no atividade sira, entaun ita taka tuku 20:00 atu ita nia sidadaun sira iha rai liur hakbesik sentru votasaun mesmu kalan,” nia salienta.
Nia argumenta, Governu propoin votus postal, votu liu husi envelope ba eleitores sira ne’ebé mak iha rai liur, bele vota liu postal, ida-ne’e governu propoin iha proposta alterasaun ida ne’e hodi nune’e bainhira aprova bele introdus eleisaun jerál ne’ebé mak sei mosu iha tinan ida ne’e.
