Enkuantu, orsamentu ne'e sei transfere diretamente ba iha Konta Tezouru Estadu Timor-Leste nian ne'ebé jere husi Ministériu Finansas. Ida-ne’e hatudu sinál konfiansa ne'ebé Governu Austrália fó mai iha sistema Tezouru Timor-Leste nian no Timor-Leste apresia tebes ba konfiansa ne'e.

Ministru Prezidensia Konsellu Ministru, Fidelis Leite Magalhães hatete, selebrasaun akordu ne’e nuudar kontribuisaun finanseira direta ida hodi apoia reziliénsia komunitária no rekuperasaun ekonómika iha Timor-Leste durante pandemia globál COVID-19 Faze da-3 nian.

“Tuir akordu ida-ne’e, Governu Austrália hakarak realiza kontribuisaun finanseira direta foun ba Timor-Leste, ho valór to’o dolar australianu millaun 20 (besik dolar amerikanu millaun 14), atu apoia komunidade no hadi’a sira nia infraestrutura  sira liuhusi Programa Nasionál Dezenvolvimentu Suku (PNDS), husi subsídiu “Bolsa da Mãe-Nova Geração”, no apoiu ba mobilidade laborál,”dehan nia iha Palasiu Governu, kuarta (18/01).

Entretantu, akordu ne’e prevee katak PNDS sei implementa iha suku 452, no prevee katak subsídiu Bolsa da Mãe-Jerasaun Foun, ne’ebé sei haluan ba Munisípiu seluk aleinde munisípiu sira ne’ebé daudaun ne’e prevee ona, no mós katak programa Mobilidade Laborál sei implementa iha Dili.