Primeiru Ministru, Kay Rala Xanana Gusmão, iha nia diskursu hateten, kompromete atu kontinua ho implementasaun ba polítika nasionál saúde no mós setor edukasaun estabelese ona komisaun koordenasaun universidade no institutu ensino superior.

"Iha setor saúde, ami kompromete atu kontinua ho implementasaun ba Polítika Nasionál Saúde no Planu Estratéjiku Nasionál Setor Saúde 2011-2030, hodi masimiza esforsus hotu, atu bele garante prestasaun servisu ne’ebé di’ak liu, nune’e mós atu loke no haluan asesu ba kuidadu saúde ne’ebé ho kualidade," dehan nia, iha Palásiu Governu, horisehik.

Nia afirma, Governu ne'e sei investe iha kombate ba desnutrisaun iha país, sei investe iha ambulânsias no ekuipamentus espesializadus de apoiu ba prestasaun de kuidadus saúde, no sei investe mós iha residênsias ba médikos no atu rekruta liu tan médikos no funsionárius iha área da saúde.

Kona-ba setor edukasaun estabelese ona komisaun koordenasaun universidade no institutu ensino superior, atu dezenvolve estratéjia koletiva ida hodi reforsa apoiu estatal no atu haree ba meloria da qualidade ajdémika iha instituisoens sira ne'e.

Nune’e mós prevê ona atu subsidia universidades privadas hodi promove edukasaun no qualifikasoens ba vida profissionál no atu kontinua Dezenvolve esforsus ne'ebé nesessárius hodi implementa Eskolas Kafé iha Postus Administrativus sira hotu.

Kompromisiu ida tan, husi kompromisius ne'ebé assumidu iha Programa du Governu, maka atu kria no apoia Assosiasaun de Arte e kultura Timorense, atu kapasita no enkoraja jovens talentosos iha áreas Arte no kultura nian, hodi promove mós identidade timorense iha plataformas internasionais.

Nune’e, iha Orsamentu do Estadu ida ne’e aloka mós ona verbas atu konkretiza objetivu ida ne’e. Hanesan komprometidu tiha ona iha Programa du Governu.