Tuir komunikadu ne’ebé Online INDEPENDENTE, asesu, iha pajina ofisial MSSI, relata, apoiu ne’e hanesan, asistensia aihan pakote ba inan isin rua no inan fó susu sira.

Iha serimonia entrega ne’e, Vise-Primeira Ministra no Ministra Solidariedade Sosiál no Inkluzaun, Armanda Berta dos Santos, lori Governu Timor-Leste nia naran hato’o agradese wa'in ba governu Japaun, ne’ebé fó apoiu ona aihan mai Governu Timor-Leste liu husi WFP, nune'e hodi fó apoiu ba inan isin rua, inan fó susu inklui mós labarik sira.

“Objetivu husi apoiu ne'e, hodi reforsa programa asistensia sosiál no apoiu ba vulneravel sira, liliu inan isin rua, inan fó susu, no mós labarik sira ne'ebé ho idade menus husi tinan lima, nune'e hodi bele reduz númeru mal nutrisaun iha Timor-Leste,”haktuir komunikadu refere.

Alende ne'e, WFP apoiu mós asistensia téknika, liu husi formasaun no kapasitasaun ba tékniku sosiál no responsavel armajén iha nível nasionál to'o ba Sentru Solidariedade Sosiál sira iha Munisípiu hotu, liliu iha área hanesan jestaun armajenamentu, prosedimentu armajenamentu aihan, transportasaun externa, jestaun seguru no seguransa no jestaun frota/ fleet management.

Entertantu, apoiu ne'ebé oferese husi Governu Japaun liuhusi WFP, kompostu husi Foos fortifikadu toneladas 1.594, mina toneladas 106 no Koto toneladas 213.

Enkuantu, serimónia entrega aihan ne'e realiza iha armazen Bebora Dili no hetan partisípasaun husi reprezentante Jica-Japaun, dirijentes MSSI, inklui Xefe Gabinete Vise-Primeira Ministra no Ministra Solidariedade Sosiál no Inkluzaun.