"Ohin (horseik), hau mai iha Suku Triloka hodi halo tuir komprimísiu Oitavu Governu Konstitusional nian hodi halo distribuisaun kalen liu husi programa UKL+ B ba iha populasaun sira liu husi benefisiáriu 6,000 ba iha uma kain sira iha teritóriu Timor Leste. Iha Suku Triloka, benefisiariu uma kain 37 mak sei simu kalen ho kuantidade la hanesan, bazeia ba medida uma ida-idak nian,”dehan nia iha komunikadu ne’ebé Online INDEPENDENTE asesu, iha Pajina ofisial MAE, kuarta ne’e (19/10).
Governante ne’e hatutan, iha Postu Administrativu Baukau Vila, iha Suku 11, uma kain hamutuk 407, nu’udar benefisiáriu sira hodi simu kalen ho total kalen 2,000.
Programa ida ne'e, hahú halo distribuisaun no lansamentu ba dahuluk iha Postu Administrativu Metinaro, PAM Díli, nomós agora dadauk, hahú hala'o distribuisaun iha Munisípiu Baukau, sei kontinua ba Munisípiu Lautem , Vikeke, no mós ba Munisípiu hotu.
Programa ne’e sei termina iha fulan Dezembru tinan ida ne’e.
H nune’e, programa UKL+B ninia objetivu mak, atu troka hotu kalen sira ne’ebé aat ka feruzen ona, hodi antesipa udan labele tama, tanba ne’e, governu liu husi MAE tuir planu, iha tinan ida ne’e benefisiáriu sira bele hela ho dignu no konsidera programa ida ne’e bele subsitui nudar “Uma Naroman ba Povu” (UNP).
Entretantu, iha tinan 2023, Ministériu Administrasaun Estatal, propoin ona iha orsamentu Jeral Estadu, ba apoiu uma hamutuk 4,000, wainhira mandatu governu ne'e sei remata iha tinan oin, Governu ida ne’e sei apoiu Uma Naroman ba Povu, ba benefisiáriu ho total 11,000, signifika katak, ida ne'e la-to'o tanbá tuir dadus sensus nian relata katak, iha teritóriu Timor-Leste hotu, total família hamutuk liu 200,000 mak iha kondisaun uma ladun diak.
Enkuantu, serimónia lansamentu ne'e, hetan partisipasaun husi representante Prezidente Autoridade Munisípiu Baukau, Sekretária Ezekutiva PNDS, Komandante PNTL Munisípiu Baukau, representante Prezidente Konsellú Veteranus Munisípiu Baukau, Dirijentes Nivel Nasionál no Munisípiu, Administrador Postu, Lideransa Komunitária, estudante no Komunidade sira.
