Ministru Edukasaun Juventude no Desportu, Armindo Maia, hatete, atu promove diak liu tan labarik sira iha área saúde, liu husi projetu saúde literasia ne’ebé fornese formasaun bazeia ba konteúdu kurikulu tuir politika no padraun husi Ministeriu Saúde no MEJD, ba manorin sira iha Eskola Ensinu Báziku.
Projetu ne’e implementa ona iha tinan 2020 ba Munisipiu Likisa, Ermera no Manufahi ne’ebé sai hanesan área tarjetu sira no sei kontinua nafatin ba tinan….
Ministru hatutan, konteúdu formasaun ba manorin sira iha Eskola Ensinu Báziku bazeia ba kurikulun mak hanesan, sistema Isin-lolon (sistema dijestivu, sistema muskular no sistema eskletal), moras hada'et (malaria no denge, TBC, lombriga, saúde kulit, diarreia no IRA) no moras la hada'et (anemia), nutrisaun, malnutrisaun, saúde orál, saúde matan, matéria substánsia (tua, sigarru no droga), saúde adoloxente, primeiru sokorru, jestaun lixu eskolár, metodolojia ba hanorin nomós apoiu sanitasaun báziku hanesan fatin lixu no sentina eskola iha eskola tarjetu sira.
“Memorandu ne'e koperasaun trilateral relasiona ho programa literasia Saúde no servisu literasia saúde la'o ona durante tinan tolu, maibé ho assinatura ne'e atu garante kontinua servisu ba tinan lima nian tan hahú husi 2023-2028,”dehan nia iha salaun MEJD, Vila-Verde, Dili, tersa (06/06).
Tuir Governante ne’e, iha eskola hotu-hotu harí ona haris fatin maibé estudante barak mak seidauk hatene uza, tan ne’e liu husi programa literasia Saúde bele eduka sira.
"Programa Saúde literasia ne'e oinsa atu fó formasaun ba profesores sira, atu nune'e sira bele eduka fali labarik sira iha eskola, uma no komunidade oinsa atu uza haris fatin," tenik Ministru.
Ministru dehan, programa literasia Saúde ne'e importante tebes, ho nune’e, MEJD nia esperansa ba governu foun ne'ebé iha, bele hametin liu tan kooperasaun ne'e, no tau matan ba eskola sira liuliu kestaun ne'ebé relasiona ho saúde nian.
Iha biban ne'e mós, Ministru lori MEJD nia naran hato'o agradese ba Marry Mackillop Today ba kooperasaun ne'e no fiar katak MMT nafatin hamutuk ho MEJD no MS hodi esforsu nafatin hodi hare kestaun literasia Saúde.
Iha Fatin hanesan, Diretor MMT, Alipio Baltazar hatete, nota entendimentu ne'e extensaun ba daruak nian, ne'e hanesan komitmentu ida entre MEJD, MS ho MMT nian, ne'ebé konsege finaliza atividade durante tinan tolu nia laran.
Tanba ne'e, haree ba nesesidade públiku iha setór Saúde no Edukasaun mak MS, MEJD no MMT sei kontinua extende nota entendimentu trilateral ne’e ba tinan lima tan.
Entretantu, nia dehan, durante ne’e MMT fó ona formasaun ba profesores sira no kontinua fahe ba labarik sira no labarik sira mós iha ona kuiñesimentu kona ba programa ne’e.
Enkuantu, programa saúde literasia nafatin kontinua implementa iha Munisipiu Ermera, Manufahi no Likisa, bainhira eskola sira iha Munisipiu tolu ne'e hotu ona hafoin kontinua fali ba munisipiu seluk.
