Deputada Bankada CNRT, Maria Fernanda Lay hateten, preokupa oituan ho situasaun lixu iha Dili laran.

“Ho lixu ne’ebé liga ho laho, ema tau ai-moruk oho lahu bele, maibé tama iha valeta kuak ita ulun fatuk moras, ida ne’e indikador ida katak sidade laran foer, meiu ambiente tenke tau matan, laho ne’e kria bakteria tipropisosis ne’ebe ne’e afeta tebes ba ita ema,” dehan nia, iha Parlamentu Nasionál, horisehik.

Nia husu ministeriu saude, meiu ambiente, autoridade Munisipiu Dili tau-matan ba, see bele organiza limpeza, agora bai-loron no la’ós udan, maibé komplikadu oituan.

“Lixu barak mak iha sidade laran, ida ne’e afeta ba moras enfeksaun respiratoria ne’ebé hanoin importante tebes, ita hotu tau matan, mai ita hotu hamos ita nia sidade, hau hamos iha hau nia uma oin, maibé ema balun ba soe fali foer iha ne’eba, hau lamenta, maibé ida ne’e kultura ita nian ne’ebé hau hateten kultura ita nian, hau hateten kultura sidadaun foer, sidade mós fo’er,” nia afirma.

Hataan ba ida ne’e, Ministru Asuntus Parlamentares no Komunikasaun Sosial (MAPKomS), Francisco Martins da Costa Perreira Jerónimo hatete, promete deputadu sira nia preokupasaun sei enkamina ba Ministériu relevante hodi haree.

"Relasaus lixu nia iha kapitál Dili nian ha'u sei la esplika tán. Tanba ne'e ha'u rejista ha'u lori entrega ba sira ne'ebé komponente tanba saida mak to'o oras ne'e labele rezolve," dehan nia.