Diretor Relasaun externa no komunikasaun-APC, Anacleto Caitano hatete, informasaun ne'ebé rejistu iha semana ida nia laran husi munisipiu lima ho tipo dezastre tolu.

Munisipiu lima ne’ebé hetan dezastre naturais mak hanesan, Ermera, Baukau, Bobonaru, Vikeke no Rejiaun Administrativa Espesial Oekussi Ambeno (RAEOA).

Ho nunue'e, iha munisipiu Bobonaro, Postu Administrativu Balibo ahi-han komunidade nia uma ida, RAEOA iha Sub-Rejiaun Netibé ahi-han komunidade nia uma tolu no anin-boot sobu uma ida.

Enkuantu, iha munisipiu Baukau, Postu Administrativu Baguia akontese rai halai estragus komunidade nia uma tolu no anin boot estragus uma rua.

Entertantu, iha Munisipiu Vikeke, postu administrativu Uatulari ahi-han komunidade nia uma ida.

“Iha loron 02 fulan-Juñu, iha Munisipiu Ermera akontese anin-boot rezulta ai-tohar hodi hamate komunidade ida ho naran Marcus Mauputar idade 75,”dehan nia liu husi konferensia imprensa, iha salaun APC, Kaikoli, tersa (06/06).

Nia dehan, ba vitima dezastre naturais uma kain 11 hetan ona apoiu emerjensia, maibé vitima hirak ne’e, ekipa sei halo verifikasaun dadus hafoin bele apoiu rekuperasaun.

“Estadu bele fó apoiu rekoperasaun maibé, tenki tuir lei no.7 katak tenki hare ba estatutu rai no rai ne'ebé komunidade sira atu konstrui uma ba ne'e fó risku ba sira ka lae?. Komunidade ne'ebé iha direitu atu hetan apoiu rekoperasaun ka matéria uma nian, labele hela iha rai estadu no fatin risku, maibé tenki hela iha rai privadu," nia esplika.

Enkuantu, total dadus husi fulan-Janeiru to'o fulan-Maiu 2023, komunidade nia uma ne'ebé hetan estragus husi Dezastre Naturais hamutuk 1.154 Xefi fámilia mak afeitadas.

Husi dadus ne'e, ekipa APC halo fila-fali reverifikasaun ba komunidade sira ne'ebé nia uma hetan estragus iha de'it 618 mak kategori ba atu hetan rekopersaun ka material konstrusaun.