Governu haruka Bolseiru na’in 16 ba Indonézia hasai kursu Anestésia Featured

By Cesarina de Carvalho Jullu 06, 2024 288
Diretór FDCH, Júlio Aparício. Foto:Dok. Diretór FDCH, Júlio Aparício. Foto:Dok.

DILI: Governu liuhusi Fundu Dezenvolvimentu Kapitál Umano (FDCH) haruka bolseiru na’in 16 ba hala'o estudo iha universidade Poltekes Kemenkes, Jogja Indonézia, iha área Enfermajen Anestésia.

Diretór FDCH, Júlio Aparício hatete, bolseiru sira ne’e sei aranka ba Indonézia iha semana oin.

"Iha ne'ebá ne'e ema hahú aula iha fulan Jullu, entaun semana oin sira ba ona Indonézia, hodi hahú hala'o sira nia estudu iha universidade Poltekes Kemenkes, ba nível lisensiatura nia," dehan diretór ezekutivu, iha knaar fatin, Comoro, segunda foin lalais.

Anestésia mak mekanizmu ida ne'ebé uza hodi halo ema la’os nafatin sente, durante operasaun ka prosedimentu seluk ne'ebé hanesan dolorozu. Ida ne'e bele inklui anestésia lokal, rejionál, ka jerál, depende husi nesesidade no kondisaun saúde husi pasiente nian.

Profesionál saúde sira mak uza anestésia atu asegura katak pasiente komfortável no seguru durante prosedimentu médiku.

Nia esplika, bainhira FDCH taka sai vaga ema hamutuk 107 mak konkore, maibé ikus mai nain 16 mak liu.

"Ministériu Saúde dehan katak ida ne'e primeira vez Governu fó bolsu ba timoroan sira iha área enfermajen anestésia, entaun ne'e oportunidade ida ne'ebé di'ak tebes. Depois kuandu ami taka sai vaga ne'e, ema hamutuk 107 mak mai konkore, bainhira selesaun dokumentu iha de'it 50 mak liu, no sira ba tuir tan teste eskrita ne'e ema ema hamutuk 19 mak liu, sira ba tuir tan teste eskrita ne'e mós ema husi universidade Indonézia sira mak mai fó teste iha Komisaun Funsaun Públika (KFP), tanba servisu hamutuk mós ho KFP, INAP, FDCH no MS. Husi teste ne'e sira na’in 19 mak liu maibé tanba vaga ne'ebé mak ami fo 16 de'it entaun ema nian3 ne'e suplente, kuandu sira na’in 16 ne'e mak balun rejigna-aan ou buat ruma sira na’in-3 ne'e bele tama fali," nia esplika.

Nia hatutan, iha semana kotuk estrutura FDCH hamutuk ho ekipa Ministériu Saúde (MS), hala'o enkontru no asina karta aseitasaun ho inan-aman /responsável família sira husi bolseiru admitidu na’in sanulu resin neen (16).

"Sim, iha semana kotuk ne'e ita enkontru ona ho bolseiru nia inan aman no responsável familia sira. Objetivu husi enkontru ne’e hodi konvida inan-aman responsável família ho bolseiru sira assina karta aseitasaun hodi simu estatutu hanesan bolseiru no liuhusi ne’e hodi hatudu sira-nia komprimisiu ho MS no FDCH, nune’e simu ona aseitasaun ba bolsa estudu ida ne’ebé governu atribui liu husi MS no hetan finansiamentu husi FDCH," nia informa.

Nune'e husu ba bolseiru admitidu sira katak aproveita oportunidade ida ne’e hodi eskola ho didiak no termina estudu tuir tempu hodi fila mai kontribui ba rai doben Timor-Leste.

"Husu ba ha'u-nia alin sira, atu imi kumpri regras universidade Poltekes Kemenkes no labele kontra ema nia regras sira.Tanba oportunidade ne’e dala ida de’it  ema hotu hein oportunidade ida ne’e maibe ita-boot sira mak nu’udar méritu ida. Tan ne’e keta halakon konfiansa parte rua ne’e nian inklui mos inan-aman sira, ba ita boot sira-nia estudo iha futuru," nia tenik.

Rate this item
(0 votes)

Independente Digital TV