Vise-Primeira Ministra no Ministra Solidariedade
Sosial no Inkluzaun, Armanda Berta dos Santos, hatete, governo lansa programa ida ne’e, ho objetivo atu hamenus mukit liu, husi hadi’ak nutrisaun no saúde, redúz ra’es-badak no aumenta rendimentu familia nian.
Aleinde, ida ne’e, familia atu sosa no han hahán oioin ne’ebé saudavel, konsulta ante-natál (ANC) dala 8 no pos-natál (PNC) dala 4, vizita fasilidade saúde hodi hetan imunizasaun no monitoriza kreximentu.
Nia hatutan, Bolsa da Mãe Jerasaun Foun, mak programa transferénsia osan ne’ebé estabelese ho Dekretu Lei númeru 22/2021 loron 10 Novembru.
“Programa ida ne’e, sei hala’o iha Timor-Leste laran fazeadamentu, hahú husi munisípiu Ainaro, Bobonaro no RAEOA iha tinan 2022 no kontinua ba territóriu tomak iha tinan hirak tuir mai,”dehan nia iha komunikadu ne’ebé Online INDEPENDENTE, asesu sesta ne’e (17/06).
Governante ne’e, haktuir, ba inan isin-rua no labarik sira ho tinan 0-3 bele hahú ba rejistu iha postu saúde sira ne’ebé besik iha sira nia área iha munisípiu Ainaro, Bobonaro no RAEOA.
Bolsa da Mãe Jerasaun Foun mak, programa transferénsia osan husi sistema asisténsia sosiál ne’ebé kompostu ba subsídiu dollar amerikanu $15.00 kada fulan ba inan isin-rua sira, durante períodu kous no $20.00 kada fulan ba labarik tinan zero to’o tinan tolu (0-3) no sei kontinua to’o labarik tinan neen (6), ho suplementu adisionál $10.00 kada fulan bainhira labarik ho moras króniku no ka ho defisiénsia.
Aleinde, subsídiu osan kada fulan, programa Bolsa da Mãe Jerasaun Foun ne’e mós, fornese akonsellamentu kona-ba saúde husi pesoál saúde sira inklui ba kuidadu saúde durante períodu isin-rua, periódu primeira infánsia inklui imunizasaun, nesesidade hahán nutritivu ba família no prátika ijéniku no sanitazasaun.
Entretantu, MSSI nia pesoál rejistu sira, destaka ona ba postu saúde hotu hodi rejista inan isin-rua no labarik tinan tolu (3) mai kraik iha munisípiu tolu hanesan, Ainaro, Bobonaro no Rejiaun Administrativu Espesial Oekuse Ambeno (RAEOA), ne’ebé sai nu’udar fatin ba implementasaun dahuluk iha tinan 2022.
