Enkuantu, iha lansamentu ne’e, MTKI hamutuk ho MAE ofisialmente distribui sesta bázika ba komunidade sira iha aldeia refere.

Tuir Ministru Turizmu Komersiu no Industria, José Lucas do Carmo, hatete, objetivu husi distribuisaun sesta bázika faze daruak nian ne’e, atu fortifika ekonomia no mós hasa’e produsaun aihan lokal iha rai laran.

Nia hatutan, programa sesta ne’e, medida ida husi planu rekuperasaun ekonomia ne’ebé halo ona iha tinan 2021 no kontinua programa ne’e ba faze daruak nian.

Nune’e, programa sesta bázika faze daruak ne’e la’o tuir baze legal, tuir dekretu lei nú.2/2022, loron 4 marsu.

"Iha programa sesta bázika faze daruak nian, produtu sira ne’e mai husi rai laran, balun deit mak husi rai liur tanba, produto rai laran la sufisiente,”dehan nia iha Aldeia Baia Leste, sesta ne’e (17/06).

Governante ne’e, esplika, produtu ne’ebé importa husi rai liur mak, masin-midar, mina-sona, sasan ijiene, deterjen, foos no mós sabaun.

Enkuantu, produtu rai laran mak, fos rai, manu-tolun, fehuk-roupa, modo-tahan, repollo, koto, senoura, tomate no aifuan sira seluk tan.

Nia informa, programa ne’e atu la’o ho diak, presiza ema hotu nia kontribuisaun atu apoiu maximu ba implementasaun programa refere, tanba program ne'e laos governu nian de'it maibé nia benefesiu ba iha povu sira nune'e ema hotu tenke ho responsabilidade.

Programa sesta bázika faze daruak ho nia mekanismu hanesan mós faze dahuluk nian, kada ema ida sei hetan sasan ho montante dolar amerikanu $50.

Iha fatin hanesan, Xefe Suku Komoro, Eurico Guterres, hatete, total benifisiariu ba sesta bázika iha suku refere hamutuk 1.500, enkuantu husi aldeia Baia hamutuk 240.

Entretantu, total benifisiariu ba sesta bázika faze daruak nian hamutuk millaun 1.4 ho orsamentu hamutuk dolar amerikanu tokon U$80.