Sekretáriu Estadu Konsellu Ministru no Komunikasaun Sosiál, Matias Freitas Boavida hatete, maski OR hetan ona xumba, maibé Governu iha orsamentu duadesimu asegura funsionamentu Estadu.

Tuir nia, deklarasaun opozisaun la fó oportunidade ba Bloku Koligasaun (BK) atu hetan oportunidade hetan solusaun.

Nia dehan, orsamentu duadesimu sei utiliza durante fulan rua, maibé Governu buka meius halo poupansa ba orsamentu bainhira nesesidade urjente.

“Ita sei iha osan duadesimu hodi asegura Estadu ho povu ne’e tomak”, dehan Matias, iha Palásiu Governu, horisehik.

Tuir nia, desizaun sira ne’e akontese tanba deputadu sira iha PN mak foti. Ne’e duni Governu iha osan rezerva duadesimu hodi responde ba nesesidade urjénsia bainhira nasaun ne’e enfrenta.

Maibé, Sekretáriu Estadu ne’e mós la esplika klaru kona-ba montante loloos orsamentu duadesimu ne’ebé Governu garante atu hataan ba funsionamentu Estadu ne’e.

Alende ne’e, Matias mós reforsa tan, orsamentu duadesimu rasik bainhira Prezidente Repúblika foti desizaun ba eleisaun antesipada, Governu iha verba balun aloka ba eventu ne’e karik akontese duni.

Tanba ne’e, orsamentu retifikativu rasik la pasa, maibé Governu iha orsamentu duadesimu hodi garante funsionamentu Estadu iha situasaun emerjénsia.