Bloku Koligasaun (BK) husi partidu FRETILIN no PD konfirma sira nia pozisaun ba aktu polítiku ne'ebé sira foti iha momentu votasaun ba rekursu admisaun proposta orsamentu retifikativu hodi abandona plenária.

Prezidente Bankada FRETILIN, Francisco Miranda Branco hatete, pozisaun Bloku Koligasaun nian ne'ebé abandona plenária tanba iha diskusaun no votasaun ne'ebé deside husi lider bankada sira ne’e halo ajenda únika. Signifika, halo diskusaun de'it ba orsamentu retifikativu, sei la diskute tan buat seluk ne'ebé fora husi asuntu markadu iha ajenda ne’e.

“Ami walk out ne’e hanesan aktu protestu ida. Tuir loloos ita diskute mak orsamentu retifikativu de'it, maibé iha prosesu admisaun diskusaun ami koopera”, dehan nia, iha Uma Fukun PN, horisehik.

Iha diskusaun rekursu admisaun proposta ne’e BK foka liu ba substánsia orsamentu retifikativu, tanba hatene katak nasaun no povu atu sai moris di'ak presiza osan atu uza hodi halo dezenvolvimentu.

Atu hasa’e kresimentu ekonomia, emprezáriu no povu barak mak sei depende ba finansas públiku liu husi investimentu públiku sira. Tanba ne’e, presiza osan atu deside emprezáriu no traballadór sira-nia vida.

Nia hatutan, aktu ne'ebé halo hodi abandona plenária ne’e la'ós lakohi diskute povu nia moris, maibé hanesan protesta ba opozisaun sira nia atitude ne'ebé hakarak hamonu governu, hatún Presidente PN no hadau podér hodi ukun.

Partidu rua ne’e halo hotu aktu sira ne’e tanba hakarak atu asegura no salva guarda ezisténsia Estadu nian hodi hasa’e ekonomia liu husi injeta finansas públiku, nune’e nasaun ne’e bele la’o di'ak tuir ema hotu nia espetativa.

Iha fatin hanesan, Vise-Prezidente PD, Luis Mendes Ribeiro hatete, deputadu husi bankada rua ne’e walk out husi plenária tanba iha ajenda ne’e giaun halo diskusaun orsamentu retifikativu, maibé to’o diskusaun halo fali votasaun ba rekursu admisaun proposta OR.

Nia hatutan, rekursu admisaun proposta OR ne’e tama ona ba kategoria nulu, maibé husi opozisaun obriga kontinua lori mai diskute, maibé sira mós kontinua rejeita tanba prosesu ne’e impede fali dezenvolvimentu ne'ebé nasaun no povu ne’e hakarak.

Tuir loloos atu buka dalan hodi rezolve povu nia moris, maibé agora daudaun ne’e fenómenu mosu oin seluk. Haree fali kuantidade atu hanehan malu hodi ignora lia loos no konsidera sala sai loos no loos sai sala.

Tanba ne’e, povu tomak tenke halo ezame konxiénsia atu iha festa demokrasia mai tan labele hili fali partidu ne'ebé nia lideransa sira laiha maturidade hodi hadi'a povu nian moris.