Defisiente, Carlito de Carvalho konsidera Eleisaun Parlamentár ida-ne’e importante tebes tanba ne’e partidu Politiku ida ne’ebé manan ba kaer ukun tinan lima, labele haluha ema ho kondisaun difisiente iha área rurál tenki fó tratamentu hanesan.

“Ha’u kondisaun defisiente, la’o la di’ak, ha’u husu ajuda familia dader tenki lori ha’u mai iha sentru votasaun tuir eleisaun. Ha’u la husu buat barak, maibé partidu ida ne’ebé mak ba ukun labele haluha ami defisiente iha área rurál. Presiza tau-matan ba ami hanesan mós maluk defisiente sira seluk iha sidade,” Carlito hateten hafoin tuir eleisaun Parlamentar iha sentru votasaun iha suku Builale, Domingu (21/05/2023).

Durante kampaña eleitorál partidu Politiku sira sempre temi ema ho defisiensia sira, tanba ne’e husu atu realiza promesa ne’e.

Durante ne’e atividade iha suku hakarak partisipa, maibé kondisaun estrada la permite atu la’o mesak, familia okupadu ho servisu buka nesidade uma laran sira labele ajuda.

“Ha’u nia hakarak governu foun tenki haree povu nia moris iha área rural. Presiza hadi’a estrada, bee moos, edukasaun no saúde. Ida ne’e importante la’ós tanba partidu Politiku se deit mak manan labele haluha tau matan netik ba ami,” nia husu.

Iha fatin hanesan eleitor Marcelino da Silva hateten, esperansa ba governu tuir mai, partidu politiku ida ne’ebé mak manan importante mak hadi’a dezemvolvimentu iha área rural hanesan estrada, ida-ne’e importante atu ema hotu asesu ho di’ak.

Iha suku Builale, Postu Administrativu Ossu, Munisipiu Vikeke, totál ema ho kondisaun defisiente na’in 10 kompostu husi desifiente fiziku, matan no tilun.