“Ida mak sra. Elia da Costa Babo hamutuk ho reprezentante partidu CNRT ho partidu Os Verdes halo partisipasaun kona ba minoridade ne’ebé iha votasaun konfirma katak mosu pratika ne’ebé kategoria krime eleitoral,”dehan nia liu husi konferensia imprensa iha salaun media CNE, Kolmera, Dili, (25/04).

Vise Prezidente ne’e hatutan, Minoridade refere ladauk atinji idade 17 anos atu vota, nia moris iha fulan Agustus 2016 no agora dadauk prosesu ba kazu ne’e enkamiña ona ba iha Minisiteriu Publiku.

Nia dehan, CNE mós simu reklamasaun husi sidadaun ho naran Duarte Maia hamutuk ho reprezentante husi Partidu Politikus CNRT no Os Verdes nian iha sentru votasaun Ep Mazof, Suku Aiasa, Bobonaro, kona ba fiskais nain rua ne’ebé uza kartaun kredensial ida no kartaun ida ne’e, ema na’in rua  mak uza kartaun refere ba vota. Ida ne’e mós keixa aprezenta ona ba iha Ministeriu Publiku no oras ne’e dadaun iha hela prosesu nia laran.

“Iha mós kazu ida ne’ebé ita hotu akompaña eleitor ida ne’ebé vota dala rua, nia nuudar fiskais husi Partidu KHUNTO nian, nia vota tiha iha sentru votasaun ida, sai husi sentru votasaun ne’e ba vota fali iha sentru votasaun seluk,”haktuir nia.

Vise Prezidente CNE ne’e akresenta, ba kazu ida ne’e fó ona nia prosedimentu no polisia halo ona investigasaun. Ho nune’e, oras ne’e dadaun haruka ona ba iha Ministeriu Publiku.