Fundu ne’e mai husi ONG 6 maka hanesan Fundu Transferénsia Públiku (FTP) tinan 2023 nian hodi haforsa ONG Nasionál sira nu’udar parseiru implemendór Governu nian ba iha Prevensaun Violénsia Bazeia ba Jéneru.
Programa hirak ne’ebé mensiona maka hanesan, Prevensaun, Servisu Sosias no Asisténsia Legál husi Planu Asaun Nasionál Violénsia Bazeia ba Jéneru (PAN-VBJ) faze datoluk ho durasaun tinan 10 husi 2022-2032.
Sekretária Estadu Igualidade no Inkluzaun (SEII) Maria Rosario Fatima Correia hateten, orsamentu ne’ebé hodi apoiu ONG neen ne’e mai husi Fundu Transferénsia Públiku nian ne’ebé SEII aloka iha tinan ida-ne’e ho montante rihun $200,000 hodi apoiu Grupu Benefisiáriu Feto iha Munisípiu 12 no inkluiRAEOA no ba ONG sira ne’ebé hanesan parseiru implementadora ba iha PAN-VBJ no Haforsa Vitíma Sobrevivente Kbiit La'ek Husi Konflitu Pasadu.
Enkuantu, esforsu no advokasia ne’ebé SEII hamutuk ho parseria sira halo, ohin loron Estadu Timor-Leste konsidera ona Loron Nasionál Feto iha dia 3 Novembru hanesan Loron Feriadu Nasionál hodi fó onra ba partisipasaun Feto iha Luta ba Ukun Rasik An no Loron Komemorativu ba Ema ho Defisiénsia 4 Jullu tanba Timor-Leste ratifika ona Konvensaun Ema ho Defisiénsia.
Entretantu ema hotu inklui sosiedade sivíl atu nafatin tau forsa hamutuk hodi luta ba dezigualdade hasoru feto no labarik-feto sira no husu atu planu ne’ebé oras ne’e daudaun la’o hela atu Governu foun ne’ebé mak mai atu kontinua nafatin liuliu revisaun ba iha Lei Kontra Violénsia Doméstika (LKVD) no Kódigu Penál ne’ebé iha ona Parlamentu Nasionál iha Komisaun A.
ONG nen ne’ebé asina akordu ho SEII, sei hala’o atividade sira mak hanesan, FOKUPERS sei hala’o atividade Haforsa Koordenasaun no Mekanizmu Referál Violénsia Bazeia ba Jéneru ne’ebé Efetiva hodi Asegura Implementasaun Pilár II Servisu Sosias, Fundasaun Alola sei foku ba Pilar, Prevensaun Violénsia Bazeia ba Jéneru, ALFeLa, sei foku ba Pilár Asisténsia Legál no Haforsa Kapasidade Feto no Foin-sa’e Feto.
Kona-ba REDE FETO sei hala’o atividade foku Advokasai hodi Hapara Violénsia Bazeia ba Jéneru ba Grupu Vulnerável iha Munisípiu Díli, Ermera no Liquiça; ACbit sei hala’o atividade foku ba iha Promove no Haforsa Sobrevivente Kbiit Laek Husi Konflitu Pasadu, liuhusi Hasa’e sira-nia Kapasidade no Asosiasaun Feto Potensiál iha Munisípiu 12 sei hala’o atividade foku ba iha Hakbiit Lideransa Feto no Portadóra Difisensia sira iha Partisipasaun Feto ba Eleisaun Suku 2023.
Orsamentu ne’ebé aloka ba iha FOKUPERS hamutuk rihun $10, Rede Feto hamutuk rihun $10, Fundasaun Alola hamutuk rihun $10, ACbiit rihun $15, no AFEMDIL hamutuk $3,000 no durasaun ba atividade durante tinan ida.
