Estadu Emerjensia nian ne’e, limita de’it movimentasaun ema nian, hodi evita sirkulasaun surtu KOVID-19, enkuantu importasaun sasán nesesidade báziku sira no medikamentu nian kontinua la’o hanesan baibain.

Governu liuhosi Ministru Kordenadór ba Asuntu Ekonómiku, Fidélis Leite Magalhães, iha segunda semana ne’e konvoka ona enkontru Jeral ida ho dirijente AIFAESA, Sentru Lojístiku Nasionál (CLN sigla portugés) no Ajénsia Importadór sira, oinsá halo preparasaun di’ak atu asegura katak nesesidade báziku kontinua sírkula normal iha merkadu sira, no vida ekonomia kontinua la’o normal.

Iha enkontru ne’e, CLN relata katak stock nasionál sei seguru hela, karik iha kazu nesesáriu tebes atu blokeiu, garante ekonomia rai-laran sei la’o aguenta to’o fulan 4 oin mai.

Parte AIFAESA ho ajénsia importador sira sei halo kontrolu ne’ebé rigor ba armazén no loja sira atu nune’e evita importador ka loja na’in sira hasa’e folin.

Tanba ne’e, komunidade sira labele pániku no tauk ba folin nesesidade bazika ne’ebé mosu indikasaun emprejariu ka importadór sira sei aproveita hodi hasa’e folin.

Governu alerta ona katak, komunidade sira ne’ebé ba sosa sasán iha loja sira, karik haree folin la razoável, bele hato’o keixa ba parte kompetente hanesan Polísia ou AIFAESA atu sira bele tuun intervein hodi fó sansaun ba loja nain.

Tanba Governu sei la tolera importadór ka loja na’in sira ne’ebé aproveita oportunidade buka lukru ba an rasik iha situasaun emerjensia nia laran.

Tuir mai personalidade ne’ebé ita-boot sira presiza kontakta bainhira haree sasán folin sa’e derpente iha loja: Koodenadór AIFAESA, Abílio Sereno: 77960898; Diretor Operasionál AIFAESA, Gabriel da Costa: 77087428; Responsavel Divisão Informação Pública da AIFAESA, Francisca Fátima: 78528835.(KI)