“Ho aprovasaun ba diploma ida-ne’e, prazu distribuisaun sesta bázika, molok ne’e define ona to’o loron 30 fulan-maiu tinan 2023, extende tan to’o loron 30 fulan-juñu tinan 2023, ne’ebé sei suspensa atividade distribuisaun ne’e durante períodu kampaña eleitorál, ne’ebé legalmente fiksa ona ba eleisaun lejizlativa ne’ebé prevee ba loron 21 fulan-maiu tinan 2023,”dehan Ministru Prezidensial Konsellu Ministru, Fidelis Leite Magalhães, iha Palasiu Governu, kuarta (22/03).
Governante ne’e dehan,distribuisaun sesta bázika ne’e estabelese husi Dekretu-Lei nu. 10/2022, loron 4 fulan-marsu, ne’ebé aprova ona medida sira ba reforsu distribuisaun sesta bázika nian ba família timoroan sira ne’ebé presiza liu no apoiu ba operadór ekonómiku lokál sira no kria ona rejime espesiál aprovizionamentu ida ba efeitu, iha ámbitu planu rekuperasaun ekonómika nian.
Entretantu, molok ne’e, iha loron 25 fulan-Janeiru, KM deside hodi extende tan distribuisaun sesta bázika to’o iha loron 30 fulan-Maiu tinan ne’e.
Enkuantu, ho aprovasaun ba diploma ida ne'e, prazu distribuisaun sesta bázika, ne'ebé molok ne'e define ona to'o loron 31 fulan-Dezembru tinan 2022, sei hanurak tan to'o loron 30 fulan- Maiu tinan 2023.
