Projetu dekretu-lei ne’e aprezenta husi Ministru Transportes no Komunikasoins, Miguel Marques Gonçalves Manetelu.

Diploma ne'e, regula aktu no servisu administrativu sira ne'ebé relasiona ho kontrolu ba pezu hosi veíkulu sira transporte merkadoria nian, ne'ebé sujeita ba pagamentu taxa nian sira, hodi define ninia valór sira atu nune'e bele kumpre Rejime Pezu Autorizadu ba Veíkulu sira Transporte Merkadoria nian.

“Valór Taxa ba pezu baibain, varia tuir númeru roda iha veíkulu, hanesan, dolar amerikanu $30 ba veíkulu ho roda 4, dolar amerikanu $35 ba veíkulu ho roda 6, dolar amerikanu $40 ba veíkulu ho roda 8 no dolar amerikanu $45 ba veíkulu ho roda 10 ka liu. Verifikasaun ba ninia todan, ne’ebé hala’o hafoin hasai todan ne’ebé liu, iha kustu fiksu ho dolar amerikanu $5 kada kilograma ne’ebé liu,” dehan Komunikadu ne’ebé Online INDEPENDENTE Sita Iha Pajian PCM, Segunda (16/12).

Enkuantu, Diploma ne'e mós estabelese limite másimu pezu ne’ebé hetan autorizasaun ba kategoria veíkulu ida-idak hanesan, 5.000 kg ba veíkulu ho eixu 2 no roda 4,  kg 8.500 ba veíkulu ho eixu 2 no roda 6, 15.500 kg ba veíkulu ho eixu 3 no roda 6, no 18.000 kg ba veíkulu ho eixu 3 no roda 10.

Veíkulu sira ne’ebé servisu ba Estadu, forsa defeza no seguransa, misaun diplomátika no entidade públika sira seluk hetan izensaun hosi regulamentu ida-ne’e. Sei bandu sirkulasaun veíkulu sira nian to'o regulariza taxa pendente sira no pezu boot liu, ho sansaun sira ne'ebé prevee iha lejizlasaun ne'ebé bele aplika bainhira laiha kumprimentu.

Dekretu-Lei ida-ne’e ho objetivu atu kontribui ba prezervasaun infraestrutura estrada no ponte, hadia seguransa iha tráfiku automovel no garante kumprimentu ba padraun legál husi operadór transportes merkadoria nian.