Objetivu husi formasaun ne’e mak, oinsá atu kapasita no eleva funsionáriu foun sira ninia koñesimentu kona-ba lala’ok servisu INSS no Fundus Rezerva Seguransa Sosiál (FRSS) nian, liu-liu kona-ba Sistema Seguransa Sosiál iha Timor-Leste, antes sira hala’o kna’ar iha munisípiu sira, nune’e bele presta servisu ho kualidade wainhira fó atendimentu ba benefisiáriu sira.

Vise-Ministra Solidariedade Sosiál no Inkluzaun, Céu Brites fó parabéns ba funsionárius foun sira, tanba liu husi prosesu ne’ebé naruk sira bele liu hodi sai funsionárius iha INSS.

“Presiza iha formasaun hanesan ne’e, atu imi bele iha koñesimentu ne’ebé mak adekuadu ba natureza servisu MSSI nian, liu-liu ba sistema servisu INSS nian no Fundus Rezerva Seguransa Sosiál-FRSS rasik, hodi bele fó atendimentu ne’ebé mak kualidade ba komunidade sira,” dehan Governante ne’e liu husi Komunikandu ne’ebé Online INDEPEDENTE Asesu.

Vise-Ministra mós enkoraza funsionárius foun sira atu hatudu profesionalismu, servisu ho responsabilidade no onestidade, transparánsia, integridade, loyalidade no presiza servisu ho ekipa hodi mellora atendimentu ba komunidade no hasa’e kredibilidade INSS nia servisu. 

Prezidente Institutu Nasionál Seguransa Sosiál, Arlindo Pinto fó boas-vindas ba funsionárius foun sira no nia husu ba sira atu halo adaptasaun ba ambiente ho ninia sistema servisu iha INSS rasik.

“Imi sei hala’o servisu maka’as iha munisípiu, tanba kada fulan 3 (Trimestral), INSS sei halo pagamentu (red-Pensaun Sosiál). Tanba ne’e, hau husu ba funsionárius sira atu fó atendimentu ida ne’ebé mak di’ak ba komunidade/benefisiáriu sira”, dehan Presidente INSS.

Enkuantu, Funsionariu 86 mai husi munisipiu 13 ne’ebé Institutu Nasional Seguransa Sosial rekruta ona. No formasaun refere sei realisa durante loron rua hahu husi loron neen to’o loron hitu fulan Junhu tinan ne’e.