Tuir komunikadu ne’ebé Online INDEPENDENTE asesu iha pajina Ministeriu Finansas, relata, fontes reseitas maioria mai husi pontu entrada sira hanesan portu, aeroportu, fronteira terrestres Batugade no Salele ho nia kategoria impostu sira hanesan tuir-mai ne’e, impóstu importasaun tokon $5,1, impóstu seletivu konsumu $7,8 milhões no impostu sobre venda $2,9 milhões .
Aleinde, penalidade sira hamutuk rihun $114 resin kustu importasaun ka esportasaun rihun $13 resin no impostu alfandega sira seluk iha rihun $20 resin.
Entretantu, introdusaun impostu hirak ne’e mós sai nu’udar instrumentu fiskál ida, ne’ebé Governu uza hodi hasa’e koleksaun reseitas doméstika iha futuru hodi redús dependénsia ba Fundu Minarai.
Foin lailais ne’e Prezidente Repúblika, José Ramós-Horta promulga ona Dekretu-Lei númeru 2/2023, 15 Fevereiru ne’ebé aprova subsídiu alimentasaun ba traballadór-sira ne’ebé ezerse funsaun iha Postu Integradu Fronteira (PIF) no Alfandega.
Diploma foun ne’e aprezenta husi Ministru Finansas, Rui Gomes ho razaun tanba traballadór sira ne’e, bainhira ezerse sira nia funsaun iha PIF tenke desloka permanente husi sira nia domisíliu. Aleinde ne’e, PIF no Alfandega iha períodu funsionamentu espesiál ne’ebé adapta nesesidade espesífiku ne’ebé obriga traballadór sira iha PIF no Alfandega ezerse sira nia funsaun hodi hala'o servisu ba períodu tempu ne’ebé naruk no realiza sira nia refeições fora husi oras baibain.
Ho razaun ne’e mak, Oitavu Governu Konstitusionál konsidera nesesáriu atu kompensa traballadór hirak ne’e ba sira-nia kondisaun servisu espesiál liuhusi atribuisaun subsídiu alimentasaun.
Subsídiu Alimentasaun ne’e ho montante $7 ba kada loron traballu efetivu no sei selu mensalmente hamutuk ho traballadores sira-nia remunerasaun mensál liuhusi transferénsia bankária. Montante subsídiu alimentasaun kalkula bazeia ba loron traballu efetivu husi traballadór-sira aneksa ho lista prezensa ne’ebé mak aprovadu husi superiór sira.
Diploma foun ne’e hahú vigora iha loron tuir-mai husi loron publikasaun no produs efeitu husi loron 1 fulan-setembru 2022.
